迪欣湖踩單車

冇野開心得過家庭樂, 仲要當兄弟姊妹成家立室後, 加上工作又忙, 唔好話約去玩, 就算約食飯都唔係咁易. 呢個星期日多得姐姐做搞手, 我地全家人(一共十三人)全部總動員為慶祝父親節, 一齊去咗我好耐冇去既迪欣湖玩踩單車.

當日天氣算唔錯, 不過就真係熱到有D頂唔順, 好在阿哥家姐佢地有車, 可以好快去到, 仲可以帶私伙單車去踩, 我就冇啦, 最後偷偷地借姪女ELISE架車踩, 好開心呀真係! 我呢個吸蚊人, 當日隻腳真係有超過廿粒蚊呀, 腫晒! 不過開心到都冇理咁多, 一於踩同玩咗先算! 我地仲租咗一架六人一齊踩既單車, 一家人好努力咁踩呀踩, 非常好笑! 今次活動提醒我唔好成日掛住工作, 要多D時間陪下屋企人先得! 我會成日提自己, 你地都要呀!

 

屋企露台從天而降的種子開花

多得朋友幫忙, 終於知道我露台從天而降的是什麼花, 它是"馬齒莧", 很有中藥價值, 極之粗生, 喜歡夏天, 夜晚D花會訓覺! 強悍既性格很切合我地屋企既環境, 我會好好照顧你, 快高長大! 看見黃黃的花朵, 滿心歡喜!

一起身出露台見到開晒花，好開心 (未訓醒)。

 

好似話可以煮菜食, 仲可以醫冶外傷!

http://taiwanpedia.culture.tw/web/content?ID=6536

WebTrends Certified Professional

終於成功完成連續7日既全天侯WebTrends Training, 第8日仲成功PASS咗佢地個 Certified Exam, 我地十日(連埋VENDOR)應該成為香港第一批既WebTrends Certified Administrator, 雖然考咗唔會有人工+, 但係都叫做完成一件事, 大家都好開心, 同埋呢幾日都唔想再講"Webtrends”呢個字, 有D想嘔, ha ha!

A good trainer: Perry Gene from WebTrends US

Exam in progress

吉隆坡生日旅行

三月係我同老婆大家既生日慶祝月份, 原本PLAN咗去新加坡玩四日, 想第一批人去玩華納影城同埋新開既賭場, 點知講話開成兩個月都開未到 (終於係三月十八日開), 見到唔對路, 所以改咗去我未去過既吉隆坡三日.

去前都知道好熱, 但係真係估唔到熱成咁, 聽講呢D東南亞地方, 日日都差唔多會落雨, 不過我地好好彩, 除咗第一日落狗屎之外, 其他時間都係天晴, YEAH! 我第一次去吉隆坡, 比我既感覺有D似泰國, 除咗冇得去Message, 對我來講都係咁玩, 即係飲飲食食做皇帝.

Rebecca預備咗好多驚喜比我, 生日當晚去咗Sheraton一間Italian餐廳食晚飯, 環境真係好靚, 又有我最鍾意既Live Band, 食物質素好高, Live Band仲走去我地度為我唱歌同切蛋糕, 好開心! 跟住返酒店, "叮噹"一聲, 又來一個酒店送既蛋糕, 真係食多肥仔, Ha!

今次個旅程差唔多食晒馬來西亞應該要食既野, 好開心好滿足既一個旅程,多謝 Rebecca LP!

  

 

網頁小子真面孔

今日係電腦搵返十二年前關於我的一篇專訪, 日子係差唔多十二年前, 1998年12月21日(星期一) 香港經濟日報 ~ 專題 C2, 題目係 <雙面人 – 網頁小子真面孔>. 我仲好記得當時我係讀緊大學一年級, 而個訪問地點係理工department既一個meeting room進行. 以前既我都係咁瘦 (好似仲瘦D?! 個頭仲娘到..), 高中至大學時候晚晚都只係訓得幾個鍾 (當時我自己搞咗間DOT COM公司), 其他時間差唔多全部送比電腦同沉迷於Internet. 由小學用Apple II Plus寫第一個Program開始, 直到第一次用9.6kbps modem玩BBS同e-mail, 再到由lynx轉到mosaic, 好似已經安排咗我要做一個IT人. 時間過得真快, 咁就玩(做)咗十幾年,人地話做個行,厭個行, 好彩我而家都仲有heart, 不過唯一唔同既係: 我已經唔可以晚晚訓得幾個鍾, 而第二日又可以好精神既年代已經不再!

麥當奴全城至Friend叮噹生日會

今年既生日過得真係好開心, 好多好好既朋友同我慶祝, 老婆仲比我一個好大既SURPRISE, 就係佢同C&A夾埋籌備咗一個好一直都好想擁有既”麥當奴全城至Friend生日會”. 有次我攞咗張宣傳單張話有麥當奴有叮噹生日會, 機會難逢, 雖然都幾十歲, 但係都想搞返個. 點知, 真係夢想成真, 係美孚廣場差唔多全部C&A都有出席, 最開心既係有埋特別家賓, 就係小生同我家姐姐夫, 小生好乖咁同我講生日快樂, 我即刻LUM晒. C&A大家都玩得好開心, 盡興而回, 有得食又有禮物, YO YO, 冇憾!

 

http://www.fotop.net/dow/mcbday10

政治人物, 很多都不可信

“xxxx, 很多都不可信” 最近成為我既名言. 點解?! 星期日去咗太子始創參加C&A新年團拜, 飲完茶大夥人準備去我屋企拜年既時候, 竟然見到TVB既方東昇, 原本係我想搵佢影相, 點知我地反轉比佢訪問返轉頭. 題目係"娛樂圈人物定係政治人物可信". 我第一個就被人訪問, 太突然, 都唔知自己講梗MUG, 最後, 我地四個人都有發言. 原本話即晚既晚間新聞就播, 大家去晒我屋企等睇, 點知連續兩既都係失望. 終於係晚間新聞播出, 雖然我只係得兩秒既出鏡時間, 但係原來好多人睇, 我FACEBOOK個STATUS有成四十幾人回應, 跟住仲有好多人打電話比我, 連D十年唔見既人都SMS我, 所以你話呢, 廣告點解咁貴係有佢既原因.

我上報紙就多, 上電視都係第一次, 下面有片睇, 大家有興奮可以睇下:

家務助理

一個星期都會清潔屋企一次, 主要我係負責一D大型工程如吸塵, 拖地, 洗廁所, 洗露台等等, 因為Rebecca日日照顧我三餐已經令佢透唔到氣. 其實呢兩年都係咁做, 屋企細到咁, 好快搞點, 同埋做家務真係可以減壓力, 至少唔使對住部電腦. 不過近年工作真係比較忙, 日日朝八晚八已經好平常, 星期六日真係想要多D私人時間做下自己野, 如想讀下書進修下. 最近新年仲要大掃除, 眼見個抽氣, 燈, 同個飾物櫃, 真係頭都痛, 屋企又大塵到你唔信, 唔知係邊度黎?!

終於決定比錢人地搞, 諗住錢解決到既問題就唔係問題 (由細都係咁教). 出去搵家務助理, 搵咗樂活一站, 又搵咗家樂仔個間, 好多間都話港島區勁難搵, (無他既, 住係呢度附近大把有錢人, 個個都有工人), 同埋車資都唔平. 最後經朋友介紹冇到一個(話做咗十年), 我地都好開心諗住兩個可以休息下, 我仲搵晒D書準備溫習. 點知搵佢做咗四個鐘 (實質係三個半鍾, briefing+佢早收工), 腦中expect佢能夠完成當然有一大段距離, 我只係叫佢吸塵同洗廁所, 都搞咗大部分時間, 都唔緊要, 我去睇下個廁所, 我話一陣唔該幫我洗埋去, 佢話"搞點啦". 我"……." 我絕對有同佢講我既要求, 都有預備所有野同一路做一路講解點做.

最後搞笑到我同Rebecca兩個不停咁parallel做埋我想佢做既野, 洗衫, kitchen等等, 我地兩個兩個幾鍾搞點晒, 佢用咗四個鍾都剩係搞到個一個我認為未洗既廁所. 原來我地不知不覺間已經成為一個專業既家務助理, 我絕對比佢更快手同專業, 結論係可能唔關佢既事, 佢可能已經做咗standard, 只係我地太高期望, 同埋要求太高, 最係點算, 咪連續兩個星期日唔出街, 公一份, 婆一份, 快快手手搞點佢啦, 我地兩個咁有潔癖, 我諗都唔使再搵家務助理, 除非有咗細路就話冇法.

足足搞咗一個鍾既飾物櫃, 雪櫃都未搞.

Wildfire ~ I am back!

上次三個月VIP Card食咗差唔多一萬蚊, 今次再買六個月既VIP唔知可以平到幾多呢?!

見證傳奇一刻

睇電視見到香港十二碼打入決賽, 令一向對香港體育冇興趣既我都無比興奮. 所以決定去現場睇同支持香港隊. 現場四萬人, 氣氛好到不得了, 大家都只係有同一目標, 就係香港隊勝出. 講真, 香港今場真係打得好好, 另眼相看, 我大叫到差唔多冇聲, 好彩坐我後面既小學生好齊心咁叫 “We are Hong Kong”, 場面好感動. 睇住射十二碼最後一球, 所有觀眾緊張到唔識講野, 當入咗勝出既時候, 大家都開心到大叫, 互相恭喜大家, 有一刻既友誼! 創造傳奇一刻, 香港好野!

 

http://www.fotop.net/dow/hk09

送你愛心小花苗

參加咗WATSONS搞既"送你愛心小花苗”活動, 到”大埔匡智會松嶺村有機農莊”拎咗兩棵萬壽菊花苗, 決定係屋企個露台種, 一大一細, 我地好比心機淋花, 願佢地快高長大, 快D出花啦!

十大"沖涼"金曲

自從大學畢業, 出去唱K既次數寥寥無幾, 就算係去, 都通常係慶祝朋友生日, 冇地方落腳而已. 唔講唔知, 其實我都幾鍾意唱歌, 細個既時候, 一到星期六日朝早, 我就會關埋房門, 跟住開到部HIFI勁大聲, 我就跟住唱唔停, 幾個鍾頭出房門, 心情極為舒暢! 平日有時跟阿哥學下"河車", 又有時會想學"克勤"咁震音既喉嚨會震下震下! 到依家有自己既屋企, 我通常都會唔理老婆既感受, 一路沖涼, 一路唱歌, 大家可以試下, 可以減壓!

咁多年既好歌多到數唔晒 (近年既唔好講), 但係真正做到聽極都唔覺悶, 而次次聽都仲係咁有FEEL既歌其實唔太多, 我就選咗我自己既十大"沖涼"金曲 (我既年代), 如下:

• 願 (林憶蓮 電影『晚九朝五』主題曲)
• 我願意  (黃國倫 演唱既版本)
• 領悟 (辛曉琪)
• 新不了情 (萬芳 『新不了情』主題曲)
• Sol#4 (蘇永康  『陽光檸檬茶』主題曲)
• 眼淚 (范曉萱）
• 幸運是我 (Sammi 99’ Concert 版本)
• 未完的小說 (彭羚 『戀愛1/2』主題曲)
• 心痛 (陳潔儀)
• 沒有你還是愛你 (林憶蓮有兩首, 好明顯係偏心)

我鐘意既大部分都係情歌?! (可能我比較感性, 情歌通常給沉醉愛情的人) 其實人人既金曲都唔同, 當然首歌好唔好聽係關鍵, 不過對我而言回憶先至係緊要, 以上既歌我一聽, 我就會想起一個畫面, 一段故事, 回憶既事有開心有傷感, 呢D先可稱得上為我的金曲! 唔知你地有冇諗起一D屬於你地既金曲呢?! 不妨share下!

P.S. 下次再同大家分享我的十大合唱金曲!

大人與細路的暑假

身邊有小朋友既同事最近都放長假期去旅行, 我諗D細路一定勁開心, 唔使返學又有得同爸爸媽媽去旅行做皇帝. 我記得我細個既時候(小學)既暑假當然冇依家D靚仔咁精彩, 屋企唔係有米，而我阿媽好博命搵錢, 忙到傻, 夜晚十二點都要出動簽約, 阿爸就由朝到晚做足六日。四兄弟姊妹通常都係自己顧自己, 我最細, 所以最幸福, 哥哥姐姐都係比最好既我 (做細係好Ｄ）, 不過我都係自己落街買野食, 周圍落街玩，好似街童咁，得閒行下文具鋪 (以前通常都有玩具買).

同埋當時美孚屋企細, 冇mug活動空間, 大哥家姐大我好多讀中學, 佢地會留係屋企好努力咁讀書. 所以通常我都係上去美孚死黨~勁爺同阿麟屋企玩超合金同打機, 玩到夜晚食飯就返屋企, 日日都係差唔多! 有時二哥都會同我去玩, 聽下音樂, 行下通利, 都幾開心! 有時覺得依家既細路既開心多咗用錢買番來，不過時代唔同咗，父母物質要求高咗呢個係改唔到既事實，細路自然受影響，不過但願大家唔好過咗火，忘記咗一家人或者友誼呢Ｄ真正令人開心既Core Value.

今個八月, 我都要好似D細路咁玩玩玩, 因為平時工作真係做不停, 所以已經安排咁多個WEEKEND既節目, 首先係會同好友C&A一齊去因特拉根,華僑城玩番下, 我地個個咁多年死黨, 不過一齊去旅行真係小知有小, 所以我真係好期待今次既旅程. 跟住仲未完, 仲有就係會同我最愛既小生家姐一家人去澳門四季酒店一晚, 靚酒店一定好正, 仲可以同小生去游水, 諗起都開心! 同場仲加影, 去埋睇SANDY LAM既威尼斯演唱會, 勁期待呀! YEAH, 做大人都可以好開心啦 😛

 

可愛的西環

最近放工搭的士返屋企既時候, 成日都見到日落MAGIC HOUR靚到不得了, 連的士司機大佬都"嘩"咗一聲. 所以今日決定早D放工 (好耐冇試過早過7點放工), 跟住就快快手咁同老婆落屋企樓下既碼頭, 睇日落同影下相浪漫下, 我地見到咁靚既景色都好開心 🙂 雖然影咗五分鍾就落雨…..睇真D原來西環都幾靚幾有味道!

 

時下的年青人

最近新聞成日話依家D後生仔又吸毒又唔讀書, 講真我聽到一D都唔覺得出奇. 因為根本咁多年來一直都有呢D後生仔存在, 只係大家冇留意佢地, 又或者冇見過一D以前所謂BAND 5既學校學生既惡行. 同埋, 就算係BAND 1名校, 都唔係個個咁乖, 都有壞人.

最記得當年我中五會考考得超低分, 低分到讀唔到中六, 但係又唔想重讀 (因為知道再考都係唔OK), 唯有去搵一D超"垃圾"既學校讀中六, 好彩多得我大哥幫手, 最後都有書讀.

呢間係一間工業中文中學, 仲要係男校, 我都預咗D學生比較差, 但係我返咗一兩個月後, 真係O晒咀. 有一次, 我返學悶悶地望出窗, 見到有十幾個初中生係操場向住大閘口狂跑, 跟住就好熟練咁爬牆途學, 日日如是. 跟住有一日我同佢地打籃球(打波可以打破隔膜), 我就八掛問佢地去邊, 原來佢地去葵X度返工賣老番VCD, 非常普遍.

再激既係, 有一次我行經過課室, 佢地係裡面拆樓, 粉刷大戰, 爬上去天花板D風扇度, 最後玩到D電線鬆晒, 成個天花板既風扇同燈全部下榻, 睇到我呆咗! 仲未夠, 又有一次, 唔知係咪有個阿SIR得罪咗一個黑道中人, 我係操場好似打緊波, 睇住有一張"燈"係一樓拋落樓, 直插阿SIR既車頂, "砰"一聲, 今次我唔知係用MUG咀去形容, 成車"LIP"晒.

仲有非禮嚴重, 因為中六有女生, 有一次有個衰仔係女廁某一格"LAY"埋, 跟住有女仔係隔離廁格既時候就係上面偷窺, 搞到個女仔大叫報警. 當然仲有好多冇數咁多既打交, 用籃球"DUMP"老師等等, 目不下吸! 佢地有冇吸毒?! 我就真係唔知. 剩係知警車係門口成日STANDBY, 999都慳返!

最近我同我D表弟妹中學生出街玩食飯吹水, 當然佢地全部都好乖, 不過我覺得時下既年青人太小同人溝通, 可能個個都FACEBOOK同MSN, 都唔使點發聲, 我覺得唔係太好, 大個做野會好汁輸, 讀書唔叻唔緊要, 只係期望佢地多D表達自己, 唔好剩係講潮語同睇o靚模啦!

值得懷念既貼紙相…最緊要係有中學生應有既天真笑容:)