你需要一部iBag嗎?!

最近睇新聞話iPad已經成為APPLE第三大收入來源, 次於iPhone同Mac機, 超越原本熱賣既iPOD. 講真, 依家差唔多所有既手提電子用品都可播MP3, 仲加上有MOOV, KKBOX呢D流動音樂, 我屋企三部iPod已經成為放係屋企扮型既擺設 (其中一部放係BEDROOM聽). 剛睇日本雜誌GOODPRESS最近一期訪問唔同階層人仕既公事袋放什麼, 全部都係呢D功能重疊既GADGETS: iPhone, iPod, iPad, DC, DLSR 等等. 我會叫呢個袋做iBag (好似叮噹個百寶袋), 因為一個袋有齊晒所有日常要既功能! 我發覺呢個iBag一定會有電話同相機分開兩部, 但係我估計, DC既需求會因為手機影相功能太強而淘汰, 最後得返專業相機同手機相機, 情況就好似依家既DV比DC慢慢取代咁. 不過我強烈要求出返一部音樂質素高既MP3 PLAYER, 我依家部160GB iPOD同我第一代iPOD既音質相比, 真係差得多, MP3已經唔係好聲, 依家用iPAD/iPhone/Android 聽歌, 聲音質素已經冇人理會, 科技先進, 但好似要求反而低咗, 真奇?! 唔通要買返DISCMAN?! …..

Advertisement

阿豆新CD推介 ~ 10Q3

最近雖然Join咗KKBOX, 可以無限download歌曲, 但係我新買既CD仍然有增無減. 原因好簡單, 一來KKBOX流行曲就好齊, 但係Jazz同Classical真係唔多, 最重要係音色, 我用部iPhone駁去我部CA+KEF播, 真係有D強差人意, 始終同CD有一段距離. 好在, 如果唔係, HMV應該都做唔住(其實根本可以stream好高bitrate既歌, 不過可能真係出咗驚冇人再買CD), 唔理咁多, 依家有好CD就要買咗先, 下面係我近期推介:

Karrin Allyson – The best of (精選碟,超值)

Melody Gardot – My one and Only Thrill

Aiko – Baby

最近迷上了他們 いきものがかり, 很喜歡女仔主音

青山テルマ – Diary

阿豆新CD推介 ~ 10Q2

都有成個幾月冇買新CD, 今日去到HMV直頭唔捨得走, 因為太多好碟想買, 但係彈藥有限, 唯有左行右行, 不停試聽! 今季阿豆新CD推介都係集中我既最愛JAZZ, 但都有CLASSICAL同POP野,

  MARINA TROST – CLOSER

德國CD同BLURAY技術出咗名高質素超斑, 德國出既女聲JAZZ 發燒碟更加唔可以錯過, MARINA TROST, http://www.marinatrost.com/marina-trost/music.html, 大家不妨試下, 可能有驚喜!

YoYo Ma, Ax, Pelman – Mendelssohn Trios

呢隻鋼琴三重奏真係必買, 我對TRIO不嬲都情有獨鍾, 三個我最愛的樂器, 三位當代最重要的音樂大師, 特別係VIOLIN: Perlman, 茱莉亞音樂院教授, 三個勁人冇搶大家風頭, 難得既一隻CD!

Stacey Kent – Raconte-Moi…

我一向都覺得JAZZ唱法文特別有FEEL, Stacey Kent, 好多人都錯覺佢係法國人, 其實佢係一個識多國語言既美國人, Raconte-Moi…既意思係聽見‧幸福, 充滿了法蘭西的優雅與浪漫~

龔柯允 – I’m Karen

生日既時候去咗馬來西亞, 發覺當地聽美國英國歌曲, 華語就聽台灣, 好似冇當地華語歌手, 超級巨聲聽過龔柯允既聲音, 覺得好有POWER, 唔錯, 搵咗好多間CD鋪, 終於買到佢既第一隻CD, 唱得真係好唔錯, 係香港發展應該會紅 (好過90%香港既女歌手)

大人之科學 ~ 自組電結他

終於係PAGEONE搵到大人之科學, 今期最貴, 因為係可以自己砌一部電結他, 有內置SPEAKER, 仲可以OUTPUT去AMP同電腦MIDI, 足足用咗我兩個幾鍾去砌! 勁有型, D聲仲唔錯, 細細部, 出街夾BAND都OK!

阿豆新CD推介 2010

新既一年首先同所有支持我個BLOG既朋友講聲"新年快樂"! 新既一年想介紹幾只值得聽既新碟, 有POP, 有BLUES, 有CLASSICAL, 全部都係呢兩個月出既, 所以係HMV或者CD WAREHOUSE一定有得買!

MISIA ~ “Just Ballade”

MISIA冇需要多介紹, 佢既第九張純情歌專輯, 鐘意呢位情歌天后既死硬派FANS就一定會買, 或者係日劇JIN既FANS. 但我都想推介比一d非fans, 特別係聽得太多港式機關槍式的唱k情歌, 覺得有d悶?! 試下呢隻循序漸進式的, 你會有另一種情歌既體會.

Norah Jones ~ “The Fall”

我係近呢一年先有聽Norah Jones既歌 (太磁性, 唔係太容易接受), 雖然呢隻係佢既第四隻專輯, 但我覺得今次佢呢隻既風格同佢前兩隻都好唔同, 今次不會讓你一聽便喜歡上，不過愈聽愈是有味道.

Katherine Jenkinjs ~ “Believe”

上一隻ALBUM我已經係個BLOG介紹過, 今次要再推介呢隻既原因好簡單, 就係以往可能家唔係幾頂得到太過CLASSICAL既曲式, 女高音係香港唔係太受落, 不過今次大師David  Foster既製作, 令隻碟COMMERICAL咗, 好定唔好?! 我就覺得係好事. 大家話呢?!

上戶彩 ~ “Happy Magic”

相信大家都知我係上戶彩既FANS, 當然識音樂都知佢唔係一位好出色既歌手. 不過佢已經有兩年多冇出碟, 今次呢隻ALBUM好配合佢既可愛開心形象, 雖然話佢唔唱得, 但我好肯定佢比香港現時大部分SELL靚女既歌手唱得好好多(特別係LIVE).

上戸彩 HAPPY MAGIC LIVE 2009 DVD

上一次上戸彩開演唱會已經係2007年, 上次我有去大阪睇佢既演出, 今年因為夾唔到時間所以冇去到, 確實係有D遺憾, 不過唔緊要, 買番佢隻DVD返屋企慢慢睇, FANS們, 你地都要支持下呀! 日本版有得買, 台版都好似下星期有貨! 期待佢既2011演出, 我今次一定會到!

Magic Flute 魔笛

上年去法國度蜜月既時候, 好捨得咁去睇咗一次OPERA, 當日係做莫札特臨終前最後一部歌劇作品 "MAGIC FLUTE", 講真, 我對OPERA係普普通通, 原因係講既對白同歌曲通常都唔係講英文, 所以比較難明白. 但係我仍然都推介"魔笛", 原因係劇情帶有童話色彩, 當然仲有令我非常期待"拿著一把刀要自己的女兒—帕米納殺死薩拉斯托"的一段高音, 次次聽都令我好興奮!

知道香港歌劇院都有得做”魔笛", 當然要捧下場! 法國的演出同香港的很不同, 可能法國的是較為抽象同新派既演繹, 利用投射科技做出特別效果, 香港就較為傳統, 平平地講故仔, 各有各特別, 冇得比較! 就快到CHRISTMAS, 又係時候去聽下聖誕兩, 24/12有港樂聖誕夜, 我買咗啦, 大家一齊去聽啦!

阿豆新CD推介

最近係公司日日都係做消防員救火, 雖知要有效地救火, 先要有清晰既頭腦先得. 人人減壓既方式都唔同, 我就會選擇聽歌, (係公司我真係會聽足一日iPod). 正因為我鍾意聽既曲式都幾廣泛, 所以一個月剩係買CD既錢都唔小野:( 今個月我想推介幾隻新CD比大家, 有興趣既可以問我借 (雖然全部係HMV都有得買)

絢香 BEST ALBUM 2006 – 2009

絢香係日本好紅, 佢一出道第一首歌"I Believe”我已經迷上佢既歌聲, 佢好有POWER既聲音, 同埋好多曲都係佢自己作, 所以唱得特別有感情. 最近佢結婚, 又宣報有病, 所以要暫休, 唱片公司所以就狂搵錢出CD, 呢隻BEST ALBUM好似有D掠水, 不過大家未聽過佢既歌就買得過, 仲有得抽獎, 抽中咗可以係日本睇佢最後MTV UNPLUGGED CONCERT.

坂本 龍一, Out of Noise

坂本 龍一 唔需要多介紹, 日本國寶級既音樂教授, OSCAR呀GRAMMY都獲獎, 即正令日本人打出外國. 我細細個我二哥已經封佢做偶像, 日聽夜聽, 佢既電子音樂真係行前人幾步. 今次呢隻2xCD, 唔使$100, 抵到冇人有, 有我最喜歡既"末代皇帝" 同 “ Merry Christmas Mr. Lawrence” 既PIANO VERSION, 仲有新曲用鋼琴融合管絃樂，以及種種來自北極圈大自然當地聲音為主，好令人感動! 推介!

Chris Botti In Boston

美國「People」雜誌「全球五十大美男子」Chris Botti 做卓頭, 呢D野我就真係冇興趣. 我鍾意Chris Botti既原因好簡單, 因為聽佢既CD唔會悶, 有時聽SAX, 好似KENNY G, 因為太RELAX, 所以會訓著. 佢既好處係利用佢既SAX同不同曲式如Jazz, Orchestra, Pop , Bossa Nova, Acoustic等既融合. 今次呢隻LIVE仲有好多大明星支持演出, 仲有DVD送, $119, 真係唔錯! 當中有我係結婚片段用既主題曲"Le Continental”, 對我好有意思ga!

  Laura Fygi ~ Songs from Movies & Musicals

聽Jazz人人都會識Dianna Krall, 不過我就會選Laura Fygi, 因為佢低沉既聲音, 令我更加鍾意佢, 聽講荷蘭人同佢個名以她為名的一種新品種鬱金香, 真係好浪漫:) 今次呢隻新CD係唱一D大家耳熟能詳既曲目, 全部都係一D經典既電影同MUSICALS既歌. 大家如果係初初學聽JAZZ, 又唔想聽D未聽過既咁悶, 不妨試下呢隻!

我仲有好多好CD推介, 下次再講! (屋企已經冇位放CD 😦

十大"沖涼"金曲

自從大學畢業, 出去唱K既次數寥寥無幾, 就算係去, 都通常係慶祝朋友生日, 冇地方落腳而已. 唔講唔知, 其實我都幾鍾意唱歌, 細個既時候, 一到星期六日朝早, 我就會關埋房門, 跟住開到部HIFI勁大聲, 我就跟住唱唔停, 幾個鍾頭出房門, 心情極為舒暢! 平日有時跟阿哥學下"河車", 又有時會想學"克勤"咁震音既喉嚨會震下震下! 到依家有自己既屋企, 我通常都會唔理老婆既感受, 一路沖涼, 一路唱歌, 大家可以試下, 可以減壓!

咁多年既好歌多到數唔晒 (近年既唔好講), 但係真正做到聽極都唔覺悶, 而次次聽都仲係咁有FEEL既歌其實唔太多, 我就選咗我自己既十大"沖涼"金曲 (我既年代), 如下:

• 願 (林憶蓮 電影『晚九朝五』主題曲)
• 我願意  (黃國倫 演唱既版本)
• 領悟 (辛曉琪)
• 新不了情 (萬芳 『新不了情』主題曲)
• Sol#4 (蘇永康  『陽光檸檬茶』主題曲)
• 眼淚 (范曉萱）
• 幸運是我 (Sammi 99’ Concert 版本)
• 未完的小說 (彭羚 『戀愛1/2』主題曲)
• 心痛 (陳潔儀)
• 沒有你還是愛你 (林憶蓮有兩首, 好明顯係偏心)

我鐘意既大部分都係情歌?! (可能我比較感性, 情歌通常給沉醉愛情的人) 其實人人既金曲都唔同, 當然首歌好唔好聽係關鍵, 不過對我而言回憶先至係緊要, 以上既歌我一聽, 我就會想起一個畫面, 一段故事, 回憶既事有開心有傷感, 呢D先可稱得上為我的金曲! 唔知你地有冇諗起一D屬於你地既金曲呢?! 不妨share下!

P.S. 下次再同大家分享我的十大合唱金曲!

上戸彩 ~ Smile Project

自從兩年前去完大板睇阿彩既演唱會, 佢差唔多兩年都冇新歌, 仲要冇再唱歌, 幾驚佢退出樂壇! 好彩, 最近佢出新SINGLE, 叫做"Smile For..”, 容易上口節奏明快既歌好配合佢既開朗kawaii形象. 我就梗係第一時間出去買啦, 仲要冒住生命危險出去信和買 (上次死唔去, 話過非必要都唔會去), 但發覺係港島區冇呢D日本野賣, 一係就等HMV, 又慢又貴. 最後仲買埋佢既POSTER, 開心到不得了! 順便梗係狂掃其他好耐冇買既日本雜誌等等啦.

最近再上去佢既BLOG, 知道原來佢會為FAN CLUB開兩場演唱會, 8月31日係大板東京, 即時諗, 咁耐冇見佢真人, 真係有D掛住, 不如去日本睇…諗咗好耐, 但係最衰已經PLAN咗十月去長假期, 最後冷靜下來, 忍心唔去, 買DVD算數啦, 因為我估計佢會再開比較大型既! 唯有睇埋佢最新既做既日劇吊住引先, 仲有, 最近得知, 原來信和有間鋪幫人申請日本FAN CLUB, 不過都幾貴, 大家有興趣可以試下!

一首能令你落淚的歌

前幾日睇TVB金像獎頒獎, 講真我對邊個攞獎興趣不大, 原因係近年真係好小睇港產片, 唯一吸引我等足一晚既當然係我最喜歡既"憶蓮"既演出. 因為屋企人既影響, 自小已經聽憶蓮, 喜歡佢可以感動人既聲音. 最令我感受深刻既係電影『晚九朝五』主題曲 "願". 好記得第一次聽係初中年代, 當時既感覺只係覺得好聽好impressive, 直至到高中年代, 記得有一次去聽佢既演唱會 (仲記得我係坐第一行:), 我記得當時佢一唱到 "我自信有日如願, 縱使天高地厚, 仍被我逆轉" 我個心真係酸酸咁, 眼淚忌唔住必晒出來, 唔知大家有冇同樣既經歷, 我可能太感情豐富?! 唔知有冇一首能令你落淚的歌呢?! 有既大家share下, 通常呢d歌都會同一d經歷或事有d情意結!

以下有佢個mtv, 大家回味下! P.S. 無綫胡亂刪剪金像獎片段惹公憤!

http://www.m1905.com/FilmInfo/film/2009/4/1921572853752.shtml

音樂與感情

自從上次係BLOG度介紹咗幾隻我心愛既Jazz音樂, 有好多好友主動留言比我分享意見, 原來好多身邊朋友都好鍾愛音樂, 特別係Jazz, 真係難得知音人. 我覺得聽音樂就好似同人既心情一樣咁, 係會因應唔多既時間同心情而轉變, 好似我自己咁, 拍拖好SWEET既時候, 我就好鍾意聽女仔唱既歌, 特別係浪漫而激動既情歌, 一路聽就一路係腦度幻想一D勁無聊既畫面, 好似當首歌一進入chrous既時候, 就想像自己係如法國好浪漫既地方同自己鍾意既人望住廣闊既地方 (通常個畫面係得個背脊) 大家情深咁你眼望我眼, 好含蓄咁拖住對方既手…又有時, 當我一個人坐車(如電車), 好大風咁吹住自己既時候, 我又會發白日夢, 想像自己拍緊MTV好似D男主角咁, 好有型咁望出外吹住海風, 後面就播住一D輕快既band sound或者bossa nova….

可能大家冇好似我咁傻成日發夢, 不過肯定既係, 音樂既影響係好重要, 有一個大家一定認同既係, 係結婚行禮, 一起結婚進行曲, 一對新人一定眼濕濕 ：）大家下次行過HMV或者CD Warehouse等等大型CD鋪, 不妨搵次去下你可能永冇入過去既"Classical & Jazz” 區域, 唔使驚人地話你唔識野都走入去, 因為音樂係冇話識唔識, 只係你欣賞與否, 只要係好音樂, 唔理係唱泰文又好, 民簇音樂又好, 電子野, 古典, 早知你鍾意聽就可以. 同埋最緊要就係睇下你當時MUG野心情, 就聽番應景既歌配合, 真係特別有feel, 唔信你試下!

介紹一下最近我喜愛既CD (Jazz & Classical):

紀念小野麗莎出道20周年有一種可以讓人放鬆心情的魔力

巴黎Clementine, 係日本好紅, 鍾意bossa nova必聽

  Melanie Dahan, 我係法國買, HMV好似有, 極力推介!

Katherine Jenkins, 靚女高音, 訓覺前relax最好:)

 

https://dowchen.wordpress.com/2008/10/05/fall-in-love-with-jazz/

未完的小說

平均一個星期都買兩隻CD, 近年既口味都係外語碟. 講真, 唔係唔想支持本土音樂, 不過用差唔多一百蚊換來既音樂, 比較一下 ROI, 都唔使諗! 同埋實在太多唔好既經歷, 香港歌手既碟剩係得首Plug Song係會較為認真製作, 其他Side Tracks真係粗製濫造 (可能budget有限), 買一隻碟得一兩首歌聽得人, 點買?!

唔知大家有冇一兩隻CD係最鍾意, 或者耐不耐會聽返而都好有FEEL?! 如果問我, 我會選擇彭羚係1994年推出既新歌加精選專輯《未完的小說》

鍾意既原因除咗首歌外, 最重要係諗返以前中學時代中晒毒既戀愛 1/2 廣播劇, 一定每晚追住聽. 而家好似係881903有得聽返, 當然而家會覺得有D"娘", 不過當時正當青春期(好似比較遲), 對愛情仲抱有好多既幻想真係好有FEEL. 仲記得自己會想像下如果自己係阿哲(郭富城) 咁型?! 跟住Cass用佢把勁LUM既聲講"阿哲…..", 嘩, 簡直係..暈低! 所以次次聽返呢首歌都有好多以前中學時代既畫面浮出來, 好享受豆芽夢簡單而直接投入冇雜質既愛情, 一切都係最sweet 🙂

唔知大家有冇共嗚?! 如果有, 你應該係同我差唔多年紀, 生於八十年代, 咁唔知你有冇類似既回憶, 有既可以大家share下?! 係呢度送上未完的小說 MTV, 大家一齊搵返中學時代既愛情夢!

情人節左麟右李

聽講年年呢個時候都係有左麟右李演唱會, 雖然Rebecca係阿麟既Fans, 但係我就年年都冇同佢去睇. 好彩, 今年情人節加開兩埸, 立即上網買票啦梗係, 順便睇下新紅館有MUG特別. 答案係, 完全同以前冇分別, 個廁所都係咁污穢. 開Show同段唔錯, 去到中段, 真係想講粗口, 叫咗幾個嘉賓, 有隊叫MR. 既人, 搞笑到上台係冇MIC比佢地, 剩係行行企企, D好歌又做晒Dance Mix, 剩係聽到bon bon聲，嘈到死, 唔知做MUG, 超級廁所位. 跟住去到後段又ＯＫ返, 都幾好睇, 有D好歌聽, 最後有容祖兒上台, 梗係仲開心啦! 如果下年再有既, 都會再去睇。

 

Fall in Love with Jazz

不同階段對音樂有不同既愛好. 自小學時代因為受二哥既影響, 接觸到好多唔同類型既音樂, 細細個已經聽外國既ROCK野同HEAVY METAL長大; 到咗中學時代可能受日本文化同朋友既影響, 勁鍾意聽日本既Pop Music (當然都有聽香港既K歌), 如松田聖子, C&A, Southern All Stars, 安室等等. 高中至大學時代又因為自己有玩小提琴既原因, 有一段時間沉迷於古典樂, Baroque(特別係Violin Concerto)同新派野都聽.

到咗而家出去工作, 人大咗 ,依然鍾意日本文化(個個星期都有睇Hey Hey Hey 同 Music Station), 偶然都會聽下Classical, 但係就更愛Jazz, 特別係女聲同live band既感覺. 而家通常我每晚訓前都會較暗屋企既燈, 搞到好似酒吧咁, 跟住開我部CA同KEF (好彩住西環, 大聲都冇人理), 聽下歌, relax下都幾Romantic幾有feel. 有時間你都可以上去我度坐下:P

以下係我推介比大家既好碟:

Diana Krall 冇人唔識, 梗係要聽! Live in Paris

Laura Fygi, 一隻唱法文, 一隻唱英文, 法文有feel d

Barbara Carroll, 把聲bass好重, 試機一流

Herbie Hancock, 又細聽到大, 水準KEEP住