C&A 瘋狂日本之旅遊記 ~ 第一日

講咗好幾年, C&A日本之旅終於成真!! 今次我地一行四對伉儷坐ANA零晨機, 由東京自駕遊玩足五日. 阿麟同Kitty做一號車司機, 而我同Jordan就二號車, 大家長征揸咗~1100KM遊歷群馬, 長野, 崎玉,山梨, 東京都. 下面係我地今次旅程既GPS路線:

 

星期五放工後大家立即回家收拾行李到機場集合, 巧遇馬記同學仔同一班機. 一心諗住上機訓覺, 點知大家可能太興奮既關係, 完全訓唔到, 三點幾仲要開燈叫人食早餐, 人都癲! 06:00到達日本機埸開車出發第一站： 榛名山.

 

朝早仲陰天落大雨, 大家都打定輸數, 點知揸咗一陣, 藍天好似跟住C&A, 經過頭文字D既五連髮夾, 個地下仲有D雪, 轉到頭都暈: ) 想搵滕原豆腐店, 點知一問之下, 已經汁咗並移為平地.  跟住再走到山上同睇榛名湖, 大家都超開心, 狂影相 ! 感受到呢個日本旅程一定好好好開心! 睇下下面呢張相,西西笑到見牙唔見眼,你話我地幾開心呢。

LUNCH係大澤屋食鳥冬同埋食天婦羅松茸菇, 唔係幾好食, 仲食剩好多菇, 真係唔係幾對得住老闆, 途經見到櫻花就發晒癲停低影唔停 手(其實周圍都係, HA HA)

下一站前往草津溫泉, 由肥西負責揸車,第一件經典事情就在此時發生。話說我地聽住彭羚柔揚悅耳既歌聲, 加上成晚冇訓, 連我一向唔使點訓既都開始頂唔住, 我同rebecca不自覺地訓咗, 突然間, 有人大嗌 “JOR~~~DAN~~~~”,睡夢中的我,成個人好似被拋出車外, 一打開雙眼,見到我地架車駛左過去對面條線,迎面仲要有架對頭車,肥西果刻"如夢初醒",大手一扭個軑盤,我地架車就即刻"唧"一聲西返去左邊, 點知西得勁得濟,肥西又大發西功,又再"唧"一聲西去右邊。。。好彩CHERRY及時叫醒西西,我地先得以保住五條命(包括對頭車那位司機小姐)。算叫做脫險之後，肥西就大叫"我頭先訓著左呀~~~~~~"

我地驚到成車都係屎, 跟住由我接手揸車繼續旅程 (西西已經呆咗), 我揸既時候, 佢地三個人六隻眼望住我揸, 看來大家已經驚到醒晒! 呢件事令我地友誼更深, 真正出生入死既好兄弟! C&A!!

Advertisement

C&A 日本之旅 2010 ~ Coming Soon

期待已久, 講咗好多年, C&A終於有機會衝出"因特拉筋"坐飛機到日本旅行. 今次我地一行八人(四對已婚但未有細路既人仕)會去日本東京玩足五日. 我地會租兩架車, 由阿麟做導遊為我地預備好既精彩旅程, 當中仲有重頭戲”賞櫻", 真係好期待呀! 快D到星期五夜晚向日本出發. 預計行程:

– 群馬縣 榛名湖 /榛名山
– 伊香保温泉街
– 草津温泉
– 赤城南面千本桜まつり
– 輕井澤
– 国宝 松本城
– 河口湖
– 甲府市
– 東京

麥當奴全城至Friend叮噹生日會

今年既生日過得真係好開心, 好多好好既朋友同我慶祝, 老婆仲比我一個好大既SURPRISE, 就係佢同C&A夾埋籌備咗一個好一直都好想擁有既”麥當奴全城至Friend生日會”. 有次我攞咗張宣傳單張話有麥當奴有叮噹生日會, 機會難逢, 雖然都幾十歲, 但係都想搞返個. 點知, 真係夢想成真, 係美孚廣場差唔多全部C&A都有出席, 最開心既係有埋特別家賓, 就係小生同我家姐姐夫, 小生好乖咁同我講生日快樂, 我即刻LUM晒. C&A大家都玩得好開心, 盡興而回, 有得食又有禮物, YO YO, 冇憾!

 

http://www.fotop.net/dow/mcbday10

政治人物, 很多都不可信

“xxxx, 很多都不可信” 最近成為我既名言. 點解?! 星期日去咗太子始創參加C&A新年團拜, 飲完茶大夥人準備去我屋企拜年既時候, 竟然見到TVB既方東昇, 原本係我想搵佢影相, 點知我地反轉比佢訪問返轉頭. 題目係"娛樂圈人物定係政治人物可信". 我第一個就被人訪問, 太突然, 都唔知自己講梗MUG, 最後, 我地四個人都有發言. 原本話即晚既晚間新聞就播, 大家去晒我屋企等睇, 點知連續兩既都係失望. 終於係晚間新聞播出, 雖然我只係得兩秒既出鏡時間, 但係原來好多人睇, 我FACEBOOK個STATUS有成四十幾人回應, 跟住仲有好多人打電話比我, 連D十年唔見既人都SMS我, 所以你話呢, 廣告點解咁貴係有佢既原因.

我上報紙就多, 上電視都係第一次, 下面有片睇, 大家有興奮可以睇下:

C&A 團拜

今年既C&A團拜去咗我西環屋企, 大家狂玩WII好開心, 夜晚仲去咗食蓮香居, 大家都讚不絕口, 仲話可以再返CALL. 願C&A個個都開開心心, 健健康康!

C&A又有喜事 ~ Cherry & Jordan

C&A喜事一浪接一浪, 今次到Jordan同Cherry. 佢地兩個拍咗拖差唔多八年, 八年真係一個唔短既時間, 想像一下, 假如佢地日日都見面, 差唔多對住大家三千日 (Hee…Hee..明白感情係唔可以用理性數字去量度同計算 :) 

今次一如以往, 我地C&A全部做晒兄弟, 雖然唔係第一次, 不過唔知點解, 我都係有D興奮緊張, 可能係眼見C&A人人都搵到真愛, 感覺特別感動安慰. 特別係在教堂, 聽見大方得睇到不得了既CHERRY講既一番說話, 更令我感動無比感動, 佢發自內心既說話, 真正打動全部人, 感覺到佢有多幸福!

當日個Rundown都幾緊密, 由朝早8點開始就冇停過, 所以大家都有D疲勞, 不過我地都為JORDAN諗咗一個驚喜送比CHERRY, 真係好"即興", 阿麟同阿基真係唔話得, 果然夠兄弟, 特登走返屋企拿結他, 即時係酒店彩排, 最後佢唱咗一首"唯獨你是不可取締", 雖然唔記得歌詞, 不過呢D唔重要, 最正既係CHERRY完全唔知情, 呢D先叫驚喜:) 一定好難忘! 當晚我負責做司儀, 講真我已經幫好多朋友做過, 都叫做有D經驗, 不過今次既Partner係Rebecca, 感覺比較新鮮, 講真當晚都有D緊張, 原因係唔想失禮佢D客人, 好彩都冇講錯野, 如某人的花名.

眼見雙方媽媽眼濕濕咁睇住自己個仔女結婚, 絕對感受到佢地有幾感慨, 對於父母, 結婚算係一個養育生涯其中一個階段既完結, 不過對於Cherry同Jordan係一個新生活既開始, 我願佢地日日都Sweet Sweet, 無論發生什麼事, 只要兩個人在一起, 都係咁幸福快樂!

 

http://www.fotop.net/dow/jordanwedding

C&A茵特拉根之旅 ~ 後記

今次C&A茵特拉根既旅程非常順暢, 既驚喜, 又好玩! 我地一行六人 (三PAIR已結婚既C&A人) 難得可以一齊離開香港玩兩日 (自從中學年代去長洲CAMP), 呢D機會唔係咁易有, 多謝發起人KITTY同阿麟. 雖然天氣就熱D, 不過大家都玩得好開心!

我地當日晨早約咗係九龍塘, 大家都好守時, 不過我個鍾唔響搞到最後要坐的士, 唉! 跟住大家就好興奮咁向拉筋進發. 一去到要等車, 已經見到有一斑香港人狂講粗口, 話等咗成個幾鍾狂CALL車都未有車去酒店, 我地心諗, 使唔使咁燥, 我地企一陣, 全身濕晒又多蚊, 明既, 咁等發, 想死, 不過我地"符碌", 轉頭就上咗去地CALL個斑車, Ha Ha!

跟住去到"車房”酒店, 都幾新幾OK, (開咗幾個月唔新就死得啦!) 又見到個斑香港人, 又係度同酒店D人嘈, 今次又話"咁大間酒店得一個經理, 有冇搞錯?!" 我地梗係彩佢地都傻, 快快CHECK-IN上房. 間房都幾OK, 幾舒服.

跟住大家就出動到華僑城搵野食, 死火, 冇車出去既原來, 配套真係一絕, 大家就硬食咁係三十幾度氣溫下行一大段路, 到咗一睇, 完全冇野好食, 間間一係貴到死, 一係就KFC (多人都傻), 最後搞到要食唔好味既快餐店, 算數, 快快食完去玩!

嘩, 眼見成個華僑城, 我諗D地真係唔使錢, 大到不得了, 成個樂園超大地方, 不過指示可以話係冇, 所有野完全係靠你自己搵或者問人, 大家慨嘆中國既野往往都係咁, 有頭威, 冇配套, 唉! 我地去咗好多地方, 花田影相, 坐車游覽, 一條只可以五十人同時過既橋, 餵"一堆"十年冇食野既金魚, 坐CABLE CAR, 夜晚就食自助餐 (丹貴軒), 夜晚再去中國小鎮大街感受美國氣氛, 都幾正!

跟住又遇到另一難題, 又係冇車返酒店, 最後上咗公車, 仲要比人屈咗一人十蚊 (明明係路經), 唉, 算啦, 有車返去都偷笑, 跟住大家一齊玩下大富翁CARD, 吹下水, 食下野, 咁就一日.

第二日去咗"大俠谷", 冇錯, 係"俠", 呢度D野食平好多, 最後食咗PIZZA HUT, 又平又好食, 呢兩日最好既竟然係呢餐, 講都唔信. 我地周圍行下, 影下相, 好耐冇影呢D旅遊一斑人既相, 感覺好特別, 我諗起大學時代去O-CAMP咁. 最後仲玩咗吊索過山車(又係"符碌"唔使排隊), 仲最走咗去深圳坐地鐵去CO-CO PARK食晚飯, 非常盡興同完滿!

C&A幾時再可以衝出中國, 一齊坐飛機去旅行呢?!

大人與細路的暑假

身邊有小朋友既同事最近都放長假期去旅行, 我諗D細路一定勁開心, 唔使返學又有得同爸爸媽媽去旅行做皇帝. 我記得我細個既時候(小學)既暑假當然冇依家D靚仔咁精彩, 屋企唔係有米，而我阿媽好博命搵錢, 忙到傻, 夜晚十二點都要出動簽約, 阿爸就由朝到晚做足六日。四兄弟姊妹通常都係自己顧自己, 我最細, 所以最幸福, 哥哥姐姐都係比最好既我 (做細係好Ｄ）, 不過我都係自己落街買野食, 周圍落街玩，好似街童咁，得閒行下文具鋪 (以前通常都有玩具買).

同埋當時美孚屋企細, 冇mug活動空間, 大哥家姐大我好多讀中學, 佢地會留係屋企好努力咁讀書. 所以通常我都係上去美孚死黨~勁爺同阿麟屋企玩超合金同打機, 玩到夜晚食飯就返屋企, 日日都係差唔多! 有時二哥都會同我去玩, 聽下音樂, 行下通利, 都幾開心! 有時覺得依家既細路既開心多咗用錢買番來，不過時代唔同咗，父母物質要求高咗呢個係改唔到既事實，細路自然受影響，不過但願大家唔好過咗火，忘記咗一家人或者友誼呢Ｄ真正令人開心既Core Value.

今個八月, 我都要好似D細路咁玩玩玩, 因為平時工作真係做不停, 所以已經安排咁多個WEEKEND既節目, 首先係會同好友C&A一齊去因特拉根,華僑城玩番下, 我地個個咁多年死黨, 不過一齊去旅行真係小知有小, 所以我真係好期待今次既旅程. 跟住仲未完, 仲有就係會同我最愛既小生家姐一家人去澳門四季酒店一晚, 靚酒店一定好正, 仲可以同小生去游水, 諗起都開心! 同場仲加影, 去埋睇SANDY LAM既威尼斯演唱會, 勁期待呀! YEAH, 做大人都可以好開心啦 😛

 

C&A籃球

上星期日搞咗個C&A籃球友誼賽, 好難得BOOK到室內場 (香港想打波都唔係咁易, D場FULL到傻), C&A全部人都好支持到齊, 我仲叫埋公司同事, 大家打返場好波! 其實我一直都好期待打呢場波, 點知唔好彩, 隻手腕傷咗, 最後打唔到! 雖然有D失望, 但係做搞手都好開心, 見到大家打得開心, 我都好興奮, 好想推動C&A籃球隊, 大家打多D波聯絡感情, 增進友誼又可以健康D, 係咪唔錯呢?! 係FACEBOOK搞咗個FAN CLUB, 大家支持下啦!

講返隻手傷, 其實一直都已經有D唔妥, 耐不耐都痛, 一直都冇理佢, 打波痛又唔理, 最後搞到嚴重拉傷先知大件事, 頂唔順去咗睇骨科專科 (當然公司有得CLAIM先去睇專科啦), 嘩, 睇一次成千蚊真係貴到傻, 一睇就係我隻手打針, 痛咗成晚, 跟住就好得好快, 依家都好咗六成, 不過就要等多一個月先可以打返波, 所以最近都係用左手打羽毛球, 係公司就用左手MOUSE, 原來都OK wor, 難唔到我既, hee..不過真係想快D好返呀, 一於下個月再搞多場友誼賽先!

http://www.facebook.com/pages/CA-/110253260357

http://www.facebook.com/album.php?aid=126063&id=110253260357

海棉寶寶 or 芝士仔 ?!

大家如果同我差唔多年紀 (即係七十年代末香港出世), 應該曾經對日本卡通瘋狂, 由小忌, 忍者小靈精, 星矢, 龍珠 等等. 我同Rebecca不約而同由細到大都好鍾意叮噹, 提外話:其實我地都係由一個叮噹玩具而開始 : P 我諗我地大家屋企擁有既叮噹物件, 真係差唔多可以開返間叮噹小型展覽館或者Cafe都得 (好似有得諗wor?!)

不過近年我地出配咗一個新龐, 佢就係 Spongebob, 台灣叫海棉寶寶, 大陸叫海棉方褲子, 香港多數人都係誤會叫佢做芝士人, 或者芝士仔, 早知就同CHEESE有關. 不過我想同大家講, 佢係百分百幾海棉, 住係水裡面既菠蘿屋, 同埋係一間叫Krusty Krab既hamburger shop負責煎野食, 同埋佢個好朋友Patrick (係一隻海星), 成日做一D好搞笑既行為! 通常卡通都有壞人, 個衰人叫Plankton, 佢成日想偷餐廳最出名既Krabby Patty Hamburger既recipe, 集集都會做一D壞事搞到海棉仔有危險! (想知多D, 可以問我借DVD, 或者去睇NOW 444台).

其實係Rebecca鍾意Spongebob先, 記得五年前去Singapore一間Toys R’ Us見到一個好大好大既海棉仔攬枕, 佢話好得意想買 (主要原因係好平), 我話冇位擺, 所以拖走咗佢, 根住可能得不到既XX是酸的既關係, 到上機返香港都煩咗幾星期話我點解唔買…我話香港都有, 點知成個香港都冇人識呢隻野, 最後係點, 當然都係買咗啦, 仲貴咗, 從此佢好似傻咗咁瘋狂愛上呢隻唔係芝士既芝士怪物.

最近好開心, C&A好友Nicole同Candy 兩個知道我地鍾意, 竟然搵到兩件好野送比我地, 一件係Candy送, 海棉仔做咗條蕉, 比佢訓覺FIT晒, 唔使捲晒我D被, 另外一個簡直係為我地而設 海棉寶寶 X 叮噹, 鍾意到不得了, 勁鍾意呀!!!!! Thank you!

日本東北 ~ へ行こう！

成日上網都睇到好多人寫日本遊記, 事實日本除咗最多人去既東京外, 其實日本仲有好多地方值得去. 日本好大, 全國劃分為1都、1道、2府、43縣, 其中北海道、東北、關東, 九州, 近畿最多香港人會去.

我識好多朋友, 差唔多如果一年只係去一次旅行既話, 一定係去日本. 有時我都會問, 咁多地方, 成日去日本唔悶mei?! 佢地既答案都好一致"一定唔悶, 只係唔夠時間玩". 好多人仲會揸車遊日本, 個個一講起就一定勁興奮討論大家既行程.

好友YY好鍾意米奇, 佢剛去完日本買咗好多手信比我, 佢知我鍾意叮噹, 買咗好多正野, 好靚好開心. 我即時一諗, D野靚到咁, 風景又靚又有特色, 你話日本唔吸引就假, 仲要衰到唔同地方有唔同既限定紀念品, 死未?!

我都去過日本好幾次, 不過未試過長過7日, 今個月尾我會去9日, 今次係"東北9天賞櫻遊", 仲首次係日本揸車,  真係好興奮, 大概既行程會係如下:

25/4 (六) – 仙台
26/4 (日) – 松島 
27/4 (一) – 青森/弘前
28/4 (二) – 十和田湖
29/4 (三) – 八戶/乳頭溫泉
30/4 (四) – 秋田
1/5 (五) – 盛岡
2/5 (六) – 上野
3/5 (日) – 東京

有野想搵我買既快D出聲啦! 手信就一定DEFAULT有既…:)

一個充滿愛既婚禮

好友阿文同Annie結婚, 身為C&A成員同埋兄弟梗係搏到盡幫手啦! 一早7:00起身, 點知前一晚腸胃炎, 頂硬上啦. 的士去到牛頭角接新娘, 一如C&A作風, 成斑兄弟都玩得好投入同放, 比起我上次結婚時候既遊戲, 今次好明顯舒服好多, 姊妹安排好有誠意, 明顯睇得出一斑姊妹真係好夠朋友充足預備. 到夜晚我負責播片同音樂, 呢D簡單任務當然難唔到我, 不過點知個酒樓經理勁廢, 成日唔知走咗去邊度, 又係度睇馬經, 擺留咗張桌都可以做得出, 搞到我都緊張要跟足D, 一陣播錯片就笑死人. 同埋見到MC阿KING都好緊張, 明既, 大家都好愛ANNIE同阿文, 真係想搞好個婚禮唔想有任何意外.

當日眼見人人兄弟姊妹雖然好眼訓, 好辛苦, 但係個個都冇怨言, 仲要勁搏命, 你地兩個真係好幸福, 有咁多咁愛你地既兄弟姊妹幫手, 成廿幾人要做到個個都咁上心, 唔容易, 要好好珍惜呀!? 跟住我Part住Jenie行禮, 係出面聽住ANNIE同阿文講我願意既時候, 雖然唔係自己結婚, 不過唔知點解個心都有D酸酸咁, 我不嬲都眼淺, 眼都有D濕濕地, 當然為咗大男人既心理, 唔可以比人知啦:P 總覺得當人搵到真正愛既人, 願意同佢行一生既路係好幸福同感動既事, 我好幸運, 我搵到, 唔知你搵到未呢?!

 

http://www.fotop.net/dow/anniemanwedding09

C&A的Rap演出

C&A 今年喜事一浪接一浪, 繼阿麟係關島情人節結咗婚後, 一個月後就到李偉文. 當日全隊C&A當日都會係兄弟, 阿KING同阿基就好有心思咁諗咗一份好好既禮物送比阿文, 就係我地拍一段RAP片講出我地既心意, 唔比佢知, 跟住係佢婚禮當日播出, 比個驚喜佢!

我地約埋一齊打波, 打完波就準備好晒所有拍攝器材, 揸住大家既戰車一同向我地既母校馬記出發, 好在見到以前既阿SIR比我地入去. 大家搞定我地既造型, 板仔LOOK同NBA Jersey, 跟住當然係MC人阿基做RAP, 一早已經預備好音樂同歌詞, 我地其實只係係後面UN下UN下扮YO, 條片唔係好長, 不過大家都拍咗成粒鍾. 我返到屋企再剪剪片, 咁就搞點, 阿文同ANNIE當日一定驚喜同感動同不得了啦!

 

條片大家有興趣既可以睇下:

 

http://www.fotop.net/dow/caball0209

好開心既三張野生日

三張野, 又結咗婚, 好似踏入咗人生另一個階段, 證明自己已經唔係再係死靚仔, 要成熟D, 大個仔, 只小D細路會叫你叔叔多過哥哥啦! 最近呢一星期, 要預備在生日當日係公司一個對我幾重要既presentation, 所以講真由朝到晚, 日日個腦都係度諗梗呢單野, 都冇話因為就生日而有特別既感覺或者節目.

點知, 原來我好好既Rebecca已經為我安排好晒. 如常返到公司, 收到電話有人叫我收貨, 心諗係咪搞錯, 點知原來佢買咗個大蛋糕比我, 真係好大個呀! 收到真係好開心好感動, 收到一D同事既禮物, 跟住LUNCH又同阿GILL去咗撐台腳, 傾咗好多野, 同佢傾計好開心好舒服. 跟住就同公司所有三月生日既好多人一齊慶祝生日食蛋糕唱生日歌, yeah!

跟住雖然有D唔舒服病病地, 照盡力去講我預備咗兩星期既presentation, 我唔知講得好唔好, 不過我已經好努力, 而且今次學咗好多野, 所以自己已經好夠! 夜晚, 老婆同我去一間叫”榮川”既日本野食晚飯, 好有FEEL呀, D野又平又好食, 真係推介呀, 一定會再返CALL, 有興趣既大家一齊去食啦, 不過要BOOK位WOR! 諗起都想再去! 返到屋企再折禮物, 再同老婆食生日蛋糕, 好飽好開心好幸福既三十歲生日.

   

Manson 飯堂

戰友Manson今日請食飯, 叫咗一斑曾經係project度搏命既”死仕”. 雖然我同大家唔同, 佢地係Vendor, 我係Client, 不過其實都冇mug分別, 因為大家都係咁努力去同一個目標, 諗返起雖然辛苦但係好開心. 我地去咗聘珍樓食飯, 有講有笑, IT人吹下水搞下難get, 有時都幾有創意! 好多人都當Vendor係敵人咁, 或者當佢地唔係人, 做死佢地話知你, 我就覺得做就梗係要做好, 不過大家都可以好友善同尊敬大家, 只要大家都記住自己係professional唔係剩係靠惡就得, 咁先做到win-win呀ma!