A blog about Dave Chen
今日係我地既結婚一周年, 又係我地拍拖既七周年. 我地依家係泰國曼谷旅行, 雖然我地已經係第六次去, 但係有人對曼谷情有獨鍾, 好似去極都唔悶. 今年好開心可以再住PLAZA ATHENEE酒店, 佢地仲好細心咁為我地預備咗一個驚喜, 就係1122當晚送咗個蛋糕比我地, 不過寫住HAPPY HONEYMOON, 都唔緊要, 只要兩個人一齊就日日都係HONEYMOON啦! 好開心既一個旅程. I love you!
http://www.facebook.com/album.php?aid=173759&id=724146647&l=0d0c0a8d7d
C&A喜事一浪接一浪, 今次到Jordan同Cherry. 佢地兩個拍咗拖差唔多八年, 八年真係一個唔短既時間, 想像一下, 假如佢地日日都見面, 差唔多對住大家三千日 (Hee…Hee..明白感情係唔可以用理性數字去量度同計算 :)
今次一如以往, 我地C&A全部做晒兄弟, 雖然唔係第一次, 不過唔知點解, 我都係有D興奮緊張, 可能係眼見C&A人人都搵到真愛, 感覺特別感動安慰. 特別係在教堂, 聽見大方得睇到不得了既CHERRY講既一番說話, 更令我感動無比感動, 佢發自內心既說話, 真正打動全部人, 感覺到佢有多幸福!
當日個Rundown都幾緊密, 由朝早8點開始就冇停過, 所以大家都有D疲勞, 不過我地都為JORDAN諗咗一個驚喜送比CHERRY, 真係好"即興", 阿麟同阿基真係唔話得, 果然夠兄弟, 特登走返屋企拿結他, 即時係酒店彩排, 最後佢唱咗一首"唯獨你是不可取締", 雖然唔記得歌詞, 不過呢D唔重要, 最正既係CHERRY完全唔知情, 呢D先叫驚喜:) 一定好難忘! 當晚我負責做司儀, 講真我已經幫好多朋友做過, 都叫做有D經驗, 不過今次既Partner係Rebecca, 感覺比較新鮮, 講真當晚都有D緊張, 原因係唔想失禮佢D客人, 好彩都冇講錯野, 如某人的花名.
眼見雙方媽媽眼濕濕咁睇住自己個仔女結婚, 絕對感受到佢地有幾感慨, 對於父母, 結婚算係一個養育生涯其中一個階段既完結, 不過對於Cherry同Jordan係一個新生活既開始, 我願佢地日日都Sweet Sweet, 無論發生什麼事, 只要兩個人在一起, 都係咁幸福快樂!
一去到法國比我第一個感覺係好冇安全感, 完全唔知點行, 冇英文都算, 地鐵又臭, D人又好恐怖咁, 個個好似”搵飯食”咁, 同英國好唔同. 搞咗成個鍾, 終於搵到間酒店, 梗係冇得同倫敦個apartment比啦, 不過都算乾淨同新.
好緊張呀, 所以急不及待就出去啦, 當然係去最出名既香謝麗舍, 仲有Christmas既fun-fair, 好多野睇, 好開心, 香謝麗舍真係好靚, 好特別. 係英國都冇mug食好野, 到法國一於全部食豪D, 去睇驗吓當地人食野既地方. 搵咗間好正推介既local餐廳叫做”Chartier”. 晚晚都好多好多人等位, 又便又好食, 我地去到encore咗兩次. 仲有食咗一直都冇試過既青口, 好好味呀, 同香港既完全係兩回事, 終於明白點解咁出名. 食呀食, 你會覺得係法國食野雖然都幾貴, 不過真係值得試! 好彩我地有”十分鍾學好法文既書”, 有佢就知點叫野食啦.
除咗正餐外, 仲有出名既macaron小圓餅法國甜點. 其實未去前Rebecca係香港已經係對佢瘋狂, 我成日都係IFC買LGB個間TUM佢開心. 去到Paris, 有最出名既LADURÉE, 直頭傻咗. 又去買佢地既Shopping Bag又狂食佢地既餅同麵包, 不過都唔夠D日本妹勁, (其實好似Tokyo都有一間, 唔明點解會咁瘋狂). 仲有當地最出名既PAUL麵包 baguette 等等.
當日既exchange rate係$9.8, 唔買LV都對唔住自己啦, 連Rebecca咁慳既都忍唔住, 我當然都有買啦, 仲好多TIM, 破財啦今次, 不過D日本人先勁, 一掃就十個八個, 買咁多唔通個個都係炒家?!
除咗食, 仲去咗好多好多地方, 好凍好凍, 但係停唔到, 日日都好似去咗做苦功咁, 勁辛苦, 不過都係好開心, 好浪漫, 第一次見到Le Tour Eiffel, 藍色發光(因為歐盟慶祝), 仲有幾粒星星閃閃, 好靚, 行上去一半, 跟住仲上到最高, 好凍 (零度), 但係好靚, 感覺好特別.
仲有去咗幾個好地方, 如凡爾賽宮, 天氣好好, 我地人生既第一次見到7色齊晒既彩虹, 仲有係Paris Opera House聽我好鍾意既Magic Flute, 歌又好聽又唔悶, 雖然票真係好貴, 但係人生總要一次. 仲有去咗一D都唔好玩既Paris Disneyland. 相信大家都聽唔小佢D唔好野, 唔使我多講. 最後仲去咗夜總會LIDO睇SHOW食FINE-DINING, 一路睇性感 SHOW (係好性感, 因為好多係冇上衫) 一路飲香檳, 你都咪話唔正! Hor Hor.
總結今次法國同英國既旅程, 我覺得係好順利同開心, 好多我地既第一次, 一個好難忘既經驗, 下次想去Swiss同Italy 🙂 唔知幾時有機會呢!
長達兩星期既悠長Honeymoon終於完咗. 今次我地去咗英國法國兩個地方, 好多我地既第一次, 第一次去歐洲, 第一次放咁耐假, 第一次見到彩虹, 等等….所以特別開心同興奮.
今次英國主要係去倫敦周圍去同埋shopping, 當然都有去近郊如劍橋, Greenwich. 一去到倫敦, 最有Christmas氣氛既就係氣溫, 雖然已經打晒底, 但係接近零度既溫度, 真係頂唔順, 好唔慣. 好在今次住係公司既apartment, 出奇地又平又新又大又乾淨, 又係勁方便勁貴既May Fair Hyde Park隔離, 仲有公司既人好好招呼, 好快就可以出動.
十二月既英國日落時間係四點正, 真係一到四點就黑晒, 其實都幾冇隱, 所以一早就起身, 跟住就出發, 通常都唔食lunch, 因為一食就冇日頭可以影相. 同埋可能真係好凍既關係, 次次返去都成身散晒! 不過都好好彩, 都有d藍天, 去咗一D必去既景點, 影咗好多靚相, 去博物館呀, 教堂呀, 大笨鍾, 白金漢, 覺得自己大開眼界好開心! 仲有最開心既就係可以睇咗兩套musical, Lion King同 Billy Elliot, rebecca 冇訓覺, 證明都唔錯 : P
英國食野就真係得個貴字, 一早已經plan好留返D彈藥去法國先fine-dining, 所以我地大部分時間都係係馬沙狂買一D我地係香港唔係好捨得買既野食, 好似prama ham, 好新鮮既salad同mushroom, etc. 買晒返apartment自己煮, 朝早仲自己煮 english breakfast, 都好鬼好食同有feel.
成個旅程去得最多既竟然係一間英國既連鎖賣衫既shop, rebecca好似傻咗咁, 因為christmas sales, 真係好平, 嘩…買到停唔到, 仲有要答謝C&A兄弟既幫手, 係一間運動衫店 SportsDirect 買咗好多手信比佢地, Yeah! 當然英國必買既Harrods就唔使多講啦, 同事手信必備.
十幾個鍾頭機周埋D時差, 其實真係留係英國既時間都係五日到, 都算OK, 跟住就去法國浪漫下啦, Part II再講!
婚禮完咗後, 全部兄弟姊妹同埋一D好朋友就一齊去飲茶, 大家都辛苦啦, 都應該慰留一下. 我地同攝影師阿BILL就食唔夠一陣就要出發去影相. 去邊?! 梗係我地最喜歡既西上環區啦. 去咗上環海邊, 又去咗佢既母校救恩堂, 仲去咗鬼屋TIM, 想搵D特別D既地方影結婚相, 個日天氣普通唔係有籃天個隻, 要睇攝影師阿BEN既技術同風格啦. 下面有幾張SAMPLE, 唔知大家覺得點呢?! 我就幾鍾意, 因為同台灣既完全唔同STYLE! 比D意見啦!
接近黃昏, 就急急腳返會展皇朝會屋企人擺酒, 好多親戚朋友已經到咗打牌, 又要針茶, 冇停啦, 不過都好開心, 因為小圍數既關係, 可以多D同親戚吹下水. 仲有最正既係, 十點就食完, 我地十點半就返屋企, 不停有朋友打電話祝福, 好開心既一日!
再一次多謝咁多位, 真係好開心得到你地既祝福, 願你地都ENJOY我地既婚禮啦, 告一段落!
自婚禮後都有成兩個星期冇update個blog 雖然facebook都可以share相同埋想講既野, 不過都係比較鍾意係自己個blog寫下自己既感受, 所以大家多D上去睇啦!
講返婚禮當日, 其實都算順利, 前一晚我獨守西環屋企, 而REBECCA就同佢阿媽係酒店訓. 都打定輸數實緊張到訓唔到, 點知十一點就訓鬼咗, 跟住由十二點直到兩點都有朋友八掛打電話比我, 最後搞到冇覺好訓, 五點就起身!
朝早接新娘就真係超超超開心, 原因係C&A兄弟團到齊, 一班識咗廿幾年既好友全部都好開心又好準時咁係酒店等我. 上去前仲影咗C&A既兄弟合照, 真係好小咁齊人, 仲要個個著晒老西咁, 有D仲要請假先到, 真係唔話得! 睇下, 大家都好有士氣!
玩新娘既時候就更加係氣氛推至高峰, 兄弟姊妹全部有成廿幾人, 成間酒店房間迫實晒, 勁熱鬧! 姊妹團好幫手, 預備咗都好多遊戲, 有”用腳夾波子”, “即場煮omlete蛋”, “長飲汽水”, “食怪味冰”, “聞嗅襪” 等等, 早知就係玩到傻晒. 係呢度真係要再一次多謝C&A同所有兄弟姊妹, 大家真係好投入, 好正, 勁幫得手! C&A兄弟就果然係好勁, 所有野都同我頂晒, 完全冇人有猶豫, 個個都博晒命, 果然係真兄弟. 見大家都玩得咁開心, 我都真係好開心, 最開心就梗係最後可以順利接到新娘啦!
玩完就到戲肉, 上去EDEN園婚禮場地, 由於太早既關係, 前一PAIR新人再行緊禮, 未可以進場, 但係真係太多朋友比面, 估唔到真係有咁多人到, 仲要大家都係早到, 好彩出面有個位可以早D影張相, 差唔多有成百人係出面等緊, 都幾混亂. 好彩早咗十五分鍾可以進埸, 個場都夠大, 兄弟姊妹們又幫手招呼賓客, 最後應該大家都有位坐.
花女grace就發揮得好好, 果然有訓練, 不過花仔小生就…行咗兩秒唔夠就跑咗去睇電視, 等我仲買咗最新既BUS比佢. 當日真係好好好多朋友到, 有好多仲要係好耐冇見, 有D係外國特登到, 又有D係請假到, 仲有好多同埋老公仔女一齊到 (大家都知我鍾意小朋友), 大家對我地咁好, 真係開心到不得了, 個一刻真係感動到想….
當日仲播咗兩條MOVIE, 其中一條八分鍾既係我自己做既, 真係都用心做咗好幾個星期, 一打風就唔出街, 雖然冇出面街咁可以有好多好勁靚既Effect, 不過都已經好努力. 唔知大家覺得點呢, 我自己係出面度睇唔到d反應, 唔知大家會唔會覺得太長太悶呢, Hope ok! 好想話心大家聽我地經歷咗好多, 同埋好多好朋友祝福好開心既感覺. 下面有得重溫.
我當日真係冇預備要講野, 一時間都唔知講MUG, 我不嬲對人講野都好小咁緊張, 所以最後只係口快快咁講出個一刻既心情, 同埋一D擺係心底既說話 (講到亂晒:P).
仲有真係要特別嗚謝好友阿Bill, 佢做司儀做得好好, 冇佢真係搞唔成, 得一個鍾要影成百幾人既相, 真係唔易, 佢真係幫到手, 好多謝佢! 下次你結婚, 我一定會幫手.
一個鍾既時間好快過, 雖然真係冇MUG時間同所有朋友傾下計, 有D趕鴨仔FEEL, 但係見到大家可以影張相同到我既婚禮, 祝福我地已經係超開心! 多謝咁多位, 逐一出去食飯再傾啦!
下面有D先睹為快既相share:
http://www.fotop.net/dow/weddingday
婚禮當日播出既八分鍾短片:
雖然距離我既大日子仲有成個星期, 不過好多好好既同事已經急不及待送結婚禮物比我啦. 其實經濟唔好, 都唔想大家破財, 不過大家都好有心, 真係好感動. 我冇擺酒, 其實大家親身到賀已經係最窩心既禮物. 聽講當日係超多人結婚, 可能好多人都唔得閒到, 剩係我自己呢兩日都要去飲就知有幾旺, 到時見啦咁多位!
我公司個位, 其中一個CORNER, 有朋友親自設計既wedding card, 又要叮噹水晶! 勁開心!
結婚當日相信最觸目既唔係我, 都唔係我女友, 而係花仔小生, 大家睇下佢呢個LOOK, 你覺得點?! 嘩, 係咪好型呢?! 問好友阿朱借咗佢個仔套禮服, (佢個仔當時應該係三歲有多), 但係因為阿生佢大隻 (未到兩歲已經三十幾磅), FIT到呢, 仲著得型個舅父, 咁點得GA 🙂 不過佢唔肯著鞋, 出街通常都係著涼鞋, 搞咗好耐先肯. 到時真係唔知點唔點, 佢仲未識講野, 又唔係拖隻利, 到時都係唔樂觀, 可能一出場就走咗去睇電視都唔定. 好在有經驗豐富又叻女既花女GRACE撐住, 應該冇問題既. 大家當日準時睇野啦!
成個結婚籌備咁多野搞, 最開心最ENJOY就係準備度蜜月, 其他野都係做SHOW同埋得同煩字, 唯獨是呢樣野係完全屬於我地既. 今次我地會去兩個星期英國同法國 (各一個星期). 真係好興奮, 真係未試過放咁耐假, 次次去親旅行都只係去幾日. 今次英國會住係公司Apartment, 有得煮下野食, 應該唔會餓死, 除咗Standard要去既地方, 當然會去下Cambridge呀遙遠D既地方, 睇下歌劇, 影下靚相咁. 尋日聽講話”倫敦70年來首次10月 落 雪”, 一聽都知大件事, 今日真係要去買件North Face頂住先得, 最緊要係唔好病, Touch wood. 法國就主要係Paris, 都係睇Opera, Disney同shopping咁啦, 詳細既行程都未定晒, 真係好忙呀!
雖然係好忙, 但係女友真係狼死, 竟然係asiamiles換咗兩張下年四月去日本既機票, 可以去9月, 嘩, 真係發咗達?! (經濟差唔好咁好wor：）仲有下年情人節好人阿麟又話係關島結婚,都唔知去唔去到咁多地方. 好似話拿簽證都要成千蚊….祝我好運 :!
結婚日子開始埋身, 不嬲懶懶閑既我地想唔搞都唔得 (人就係咁). 開始要搵D朋友出去食下飯比下請貼, 仲有最重要既係朝頭早接新娘既兄弟姊妹. 約咗廿年死黨C&A出去食飯, 順便比埋RUNDOWN佢地, 大家一睇, 嘩一聲, 大家都問”得一頁JA? 咁小野既? 我全日得係搞一樣野?! 仲要十點幾先開始” 梗係啦, 我都算係咁, 好多野都都冇搞, 至少唔使要買椰子呀, 回門呀, 諗起呢D野都想嘔! 搞結婚最怕就係呢D冇意思既傳統儀式. 各位, 到時早D到迎戰呀! 開門利是等緊你!
大家估下下面張相係MUG野?! 時間過得好快, 下個月就係我地既大日子, 所以weekend一有時間就同女友係屋企寫請帖. 當初諗住自己雖然識人多 (轉工轉得太多), 但係其實好多都冇MUG聯絡, 所以都唔會請好多人到. 同埋我都冇擺酒, 一粒鐘既儀式 (P.S. 夜晚食飯得親戚), 唔想搞太多野, 只係想請一斑好朋友開心下算數. 點知叫下叫下, 都唔小野. 基本都有成百人, 下面就係我地既請帖, 呢個月會有好多飯局派帖, 唔知你有冇份呢?! 如果冇比你, 請唔好嬲, 因為我都係唔想煩到大家, 你睇我個BLOG, 證明都係有心人, 已經好開心, 冇MUG分別! 多謝你既祝賀!
我很喜歡影相, 因為我發覺時間過得好快, 好多事好快就唔記得, 唯一能夠留住當日既感覺就係睇相. 通常結婚進埸都會播一套影片, 好似回憶錄咁. 我都抱住人有我有既心情, 花了好多個鍾既時間去搵返呢六年既所有一齊影既相, 真係多到睇一日都睇唔晒.
原本都諗住出去搵公司搞點隻DVD, 不過自大既我諗住自己做multimedia咁多年, 應該難唔到我掛, 點知搞咗幾個鍾先開始知道點用個剪片SOFTWARE. 仲要我係”完美主意者”, 今次真係大獲. 最後差唔多搞咗幾個月, (次次都係打風有假期就搞), 今日終於見到D成績, 放上DVD, 播比我屋企人PREVIEW下, FEEDBACK唔錯. 各位好友, 到時就睇下點, 如果悶都唔好放蚊, 我真係用咗心機做. 奉勸各新人都係唔好搞咁多, 呢D錢係要比人!
九月三日係叮噹 (哆啦A夢) 既生日. 佢幾多歲我就唔知啦, 因為其實佢係2112年出生. 我好好既日文老師 Cammy 佢係上次日本返香港既時候就係日本買咗個 “叮噹人形公仔” 比我. 係一PAIR既, 一睇就知到佢比我結婚既禮物, 好開心, 好靚, 因為香港買唔到. 香港人鍾意叮噹既熱潮已過, 但係日本就不停都有新野出. 真係好懷念幾年前旺角CTMA既一間專買叮噹既SHOP, 雖然老闆好串 (我係佢做串串), 但係次次去佢間野都好開心. 唔知我可唔可以開返間同各叮噹FANS交流下？！
一年前我話結婚既時候, 二哥同家姐都義不容辭咁借用B女同小生比我做婚禮當日既花仔花女. 我當然勁開心啦, 大家都知我好愛佢地. B女讀幼稚園就一定冇問題, 仲有做花女既經驗. 不過, 小生就..就真係有D危, 上星期同佢去美孚行下, 去佢最鍾意既Watsons, 唔受控制, 而家既佢係絕對唔可以比我拖住行 (除咗有佢最鍾意既車). 下星期佢返Play group, 唔知兩個月有冇轉機?! 到時可能要抱住佢行, 諗起都搞笑 !
你睇佢幾頑皮, 冇時停ga!
進入最後倒數3個月，趁星期五打風，一於攪攪D邀請卡。唔寫都唔知，淨係最好果D朋友已經成二、三十人，到時一定好熱鬧!!!
MSN/E-Mail:dave@dow.com.hk
Web:http://www.dow.com.hk
Bookmark this site by QRCode:
All rights Reserved 2007-2008
Dow Blog.... 
Comments to me