Archive for the 'Japan' Category



Wiiの間

好耐冇玩Wii, 相信好多香港人都係咁, 買咗部機剩係housewarming既時候, 玩幾野Wii Sports / Fit, 其他時間都係當"磚". 如果大家都好似我咁玩正日本版 (其實我只會買我真係好想玩既GAME), 不妨開部Wii上wi-fi download新channel.

係日本Wii已經唔係剩係打機, 佢有齊勁靚仔既電視節目表, 新聞, 天氣, 占卜, 投票 等等. 除此之外, 仲有互動功能, 你可以插SD Card load D相去Kodak, 佢會幫你做好靚既相薄 (真野), VISA比錢, 郵寄比你, 好方便. 仲有, 打打下機, 肚餓既可以上去搵你附近既ORDER送外賣野食, 又有一個新既叫”Wiiの間”, 呢個仲搞野, 一家人一齊係間屋度睇電視, 其實係一個Wii 既免費電影台, 有好多片睇, 如教煮野食, 咁好死, 唔使錢?! 日本仔真醒目, 佢係段片完咗有D贊助商賣廣告, 你可以做下佢地既問卷調查, 又可以睇下宣傳片, 如HONDA, 仲有好多車既片睇. 所以話, 香港搞online advertising都應該多元化一D (360度), 成日都係banner ad同keywords?! 唔得ga la!

P1090791  P1090789 P1090790

Advertisements

高木直子 ~ 我的30分媽媽

我通常去香港既書店都係因為想買旅遊書 (講真近年真係好少睇小說). 仲記得幾年前見到一本書幾得意, 佢叫做 "150CM LIFE", 係一本插圖, 畫功講真就真係強差人意, 不過講既野就好寫實, 講佢自己因為得150CM而帶來既生活有趣事, 可以令你放鬆心情笑下, 最好就係夜晚臨訓時睇! 畫家高木直子係日本人, 一個人到東京做插畫家, 由開始一年出兩本, 到而家一年差唔多四本, 講既野開始感性 (特別係最近既"我的30分媽媽), 畫功又越來越好, 我就買齊晒佢既台灣版, 大家想平D可以去買中国版, 當然日本版就最原汁原味同最新啦! 值得推介! 大家快D買啦, 跟住一齊傾下討論下!

P1090778

有興趣可以去佢個DIARY: http://hokusoem.com/nikki.html

最愛甜甜圈 ~ Mister Donut

自從五年前第一次係日本食過甜甜圈專門店Mister Donut, 一食就愛上咗. 特別鍾情於佢地既"波提" (台灣叫法), 一個個波波咁組成, 勁Q勁好味, 絕對唔似個間 汁咗泣外國DONUT店, 甜野野又貴又難食.

因為實在太掛住既關係, 次次去親日本, 台灣, 曼谷, 上海都會係咁買來食,咁受歡迎,當然就乘機出埋D卡通人物既紀念品啦!不過由於要食夠一定數量先可以換,我地次次食到傻,又食食帶返香港都係換得一隻杯或者電話繩。今日我住在台灣的細阿姨來左香港,佢竟然帶左兩大袋在Mister Donut換的紀念品比我地,嘩,實在太感動啦,開心到飛起!!多謝你呀,細阿姨!!! I love you !!

P1090775

日式住家製晚餐

上次去日本到依家一個月左右, 已經有D掛住日本既美食, 特別係仙台既牛舌,雖然唔可以帶成條牛舌返來,我地都買左包仙台馳名牛舌店伊達既真空包裝牛舌粒,星期六就整左餐仙台牛舌宴,加埋0係佢地度買既真空牛舌湯,湯鮮味甜,仲有仲有…就係在東京最後一晚REBECCA終於忍唔住買左既秋田米,簡直好似去左日本一樣,再加埋早兩年在大阪道具街買的便當盒,感覺十分滿足。一路食就一路好期待下次既日本之旅,唔知係幾時呢?!唔知十月有冇機會呢?!!!!!

P1090764P1090756 

P1090665 P1090758

很多第一次的日本之旅

今次9日既日本之旅去咗好多地方, 差唔多日日都去東北既唔同縣, 仲要晚晚都住唔同既溫泉同酒店, 都唔小野! 好彩早有準備, 諗住同上次英法之旅一樣日日都著住同一件衫同外套, 雖然影相就悶D同埋污穢D, 冇法啦, 今次都已經冇拎大相機, 早知盡力把行李減到最小.

去前有兩大擔心, 第一係天氣, 睇天文台話勁大雨, 仲有就係櫻花開晒, 你都咪話唔灰. 一去到仙台真係落大雨, 所以我地第一樣係日本買既野就係 "傘". 天公造美, 跟住打後八日全部好天, 仲要好到不得了, 我真係興奮到傻咗.

詳細既行程就唔係呢度講太多, 因為個個去東北既行程都差唔多, 不過今次我有好多既第一次想同大家分享一下:

第一次睇櫻花, 再一次好好彩, 去到有2600棵櫻花樹既青森弘前城, 我真係呆咗, 連靚女經過我都冇望, 剩係睇到全白色既畫面, 原來當日櫻花係滿開, 天氣非常涷, 我諗得返零度, 好明顯我係唔夠衫, 不過完全唔覺得涷, 咁浪漫既景色, 同你喜歡既人一齊經歷, 心裡覺得好溫暖.

第一次混浴溫泉, 係日本浸溫泉試過好多次, 但真係未試過混浴, 去前梗係有一D幻想, 會唔會有D日本靚女一齊呢?! 點知結果係.. 連阿婆都見唔到, 剩係得D佬係度等睇野, Rebecca一入去就, 都唔使多講! 不過原來冇人, 我同佢大家望住個大瀑布, 出面全部係雪浸住溫泉, 真係好似拍梗旅遊特輯咁.

第一次係日本揸車, 攞咗車牌多好幾年, 都冇mug點揸過, 估唔到可以租車揸, 講真, 我買咗JR PASS可以唔使點揸, 不過聽人講係日本揸車有幾正, 又話好易揸, 吸引咗我都要試下. 當日係秋田揸短程, 租車既時候, 真係好緊張, 連我幾日來都覺得好有信心既日文完全係講唔到, 最後習慣咗, 又真係幾好玩, 雖然我有GPS都行錯晒路.

第一次係東京睇演唱會, 上次係大阪睇阿彩已經好正, 點知今次係東京睇D人既氣氛仲正, 今次就睇咗我一直都好想睇既"大塚愛", 平時睇music station同佢既DVD都覺得佢好識搞氣氛, 一去到D FANS好投入好好feel, 不過就熱D, 女仔FANS可以企最前, 所以我周圍都係佬.

其實仲有好多精彩野, 講唔晒, 大家睇相感受下啦!

http://www.fotop.net/dow/japan09

P1070926

松島不但有籃天, 仲有櫻花睇, 真係好彩

P1080239

青森落雪, 雖然好涷, 但係眼見弘前城櫻花滿開, 真係前所未見咁多, 好開心! 仲有今日發覺我D日文都唔錯, 日子有功! 原來櫻花滿開(100%)是如此壯觀! 超涷, 朝早落完雪, 我諗當時大概得一度.

P1080612

今日冇揸車, 不過就去咗十和田湖畔踩單車, 諗住踩去 奧瀨溪流, 點知太大風要折返!

P1080573 P1080787

上山(八甲田雪山), 下海(奧瀨溪流), 行程緊密, 而家休息下(十和田湖), 呢兩日咁好天, 明天轉去秋田乳頭溫泉鄉再玩過.

奧入瀨溪流好鬼長, 尋晚食飯識咗幾個日本人話7點幾去行山, 我地仲話一齊, 最後梗係冇咁早啦. 最後剩係行咗一陣山…

P1080866 P1080960 P1080808

第一次係日本揸車, 感覺同香港好唔同, 好順. 今日去到角館睇埋櫻花雪, 聽日去盛岡食泠麵就返東京玩啦!

P1090310

剛係東京Zepp睇完 "大塚愛" 演唱會, 雖然企足三個鍾, 但個位好前同氣氛一流, 興奮同high到不得了! 買咗好多紀念品…有時Zepp仲好過Tokyo Dome!

P.S. 日本呢一個星期既新聞全部都係講緊豬流感, 今晚新宿條街連後生仔都戴口罩! 欣賞日本人口罩文化,!

日本東北 ~ へ行こう!

成日上網都睇到好多人寫日本遊記, 事實日本除咗最多人去既東京外, 其實日本仲有好多地方值得去. 日本好大, 全國劃分為1都、1道、2府、43縣, 其中北海道、東北、關東, 九州, 近畿最多香港人會去.

我識好多朋友, 差唔多如果一年只係去一次旅行既話, 一定係去日本. 有時我都會問, 咁多地方, 成日去日本唔悶mei?! 佢地既答案都好一致"一定唔悶, 只係唔夠時間玩". 好多人仲會揸車遊日本, 個個一講起就一定勁興奮討論大家既行程.

好友YY好鍾意米奇, 佢剛去完日本買咗好多手信比我, 佢知我鍾意叮噹, 買咗好多正野, 好靚好開心. 我即時一諗, D野靚到咁, 風景又靚又有特色, 你話日本唔吸引就假, 仲要衰到唔同地方有唔同既限定紀念品, 死未?!

我都去過日本好幾次, 不過未試過長過7日, 今個月尾我會去9日, 今次係"東北9天賞櫻遊", 仲首次係日本揸車,  真係好興奮, 大概既行程會係如下:

25/4 (六) – 仙台
26/4 (日) – 松島 
27/4 (一) – 青森/弘前
28/4 (二) – 十和田湖
29/4 (三) – 八戶/乳頭溫泉
30/4 (四) – 秋田
1/5 (五) – 盛岡
2/5 (六) – 上野
3/5 (日) – 東京

IMG_8589

有野想搵我買既快D出聲啦! 手信就一定DEFAULT有既…:)

好好食既PANCAKE餅

最近同女友瘋狂地愛上一樣零食, 就係日本出既PANCAKE餅. 係CITYSUPER或者SOGO都有 ($13), 想平既可以去十蚊店買 ($10). 最初都係試下, 一食就停唔到口, 真係好鬼好食, 食唔食, 佢就快結婚都冇忍個口, 一個人都食晒, 好恐怖. 介紹咗比D friend, 個個feedback都好好, 大家都去十蚊店搶購, 搞到冇晒貸, 得返蘋果批味, 都OK, 不過冇咁正, 大家見到記全買去試下呀!

P1010640


Latest Updates

My Calendar

March 2019
M T W T F S S
« Oct    
 123
45678910
11121314151617
18192021222324
25262728293031

Category

Facebook Badge

Dow Chen's Facebook profile

Contact Me

MSN/E-Mail:dave@dow.com.hk
Web:http://www.dow.com.hk

Bookmark this site by QRCode:

All rights Reserved 2007-2008

Advertisements