Archive for the 'Friends' Category



C&A打籃球

最近打返籃球, 梗係要搵C&A一斑好友打下波啦, 咁多年冇打, 當然唔可以好似中學時代咁好氣, 仲記得以前讀書lunch時間是但食D野 (通常都係因為想慳錢買新GAME), 跟住就快快咁去打波, 著住黑鞋 (個鞋底係完全蝕晒) 大熱天時打足成個鍾, 打到個個濕晒, 跟住又返上去上堂, 放學後又再打到食飯先返屋企. 諗返起, 後生仔就真係後生仔, 完全冇得比. 今次歸隊當然打得唔係幾好啦, 不過成斑C&A一齊打下波, 傾下計, 已經好開心啦! 

IMG_8411IMG_8453

http://www.fotop.net/dow/caball0209

神秘既魔力

好友阿朱搬咗新屋, 梗係要上去睇下啦, 其實最想係探下佢個乖仔同BB女. 佢個女女大得好快呀, 上次見佢都冇咁重, 今次上去已經廿幾磅, 我抱咗佢一陣隻手已經好痛 (小做運動既原因). 我一向都好喜歡細路仔, 但係有時我都會係度諗, 湊細路又煩, 辛苦又冇晒自由; 出去遊樂埸玩下又話驚比人傳染有病, 唔出聲又話驚佢係咪傻, 周圍走又驚佢過度活躍, 大咗又驚佢讀唔成書, 考唔到好學校跟住學壞…呢份終生職業, 點解D人都肯做?!

最近同身邊既朋友傾開計, 根據我阿豆非正式統計, 十個有八個剛新婚或已經結咗兩三年婚既朋友, 都冇打算生小朋友, 原因唔使講都知, 都係冇錢, 冇時間, 冇自由, 等等. 而都有一兩個朋友會生小朋友, 不過梗係一個起兩個止, 原因好簡單, 都係冇錢, 冇時間, 冇自由, 同埋冇人湊. 通常兩公婆都係要做野, 如果唔係根本供唔起樓, 跟住OT就一定, 朝八晚八就DEFAULT, 好多人星期六都要做埋. 仲有, 香港屋企細到咁, 睇住個細路冇地方走, 唔通真係係個廳度轉圈?! 諗起呢D問題, 你仲敢唔敢?!

利用多角度想法, 事情仲有兩面, 冇錢?! 可以慳D (問下自己平時出街食幾多錢飯?! 問下自己買幾多冇用既野?!), 冇地方?! 可以多D去公園玩. 冇時間 (問下自己一日通常用幾多時間玩FACEBOOK/MSN?) 所有野既出發點都係兩個字, 付出! 我仲未有細路, 所以都未肯定我可唔可以付出?! 不過, 最近有個好朋友清清有咗BB, 係有咗既時候佢同我傾計, 我覺得佢好似好多野擔心同冇特別好開心咁, 最近佢知道會生個仔(其實佢老公係鍾意女多D),  兩個不知幾開心興奮, 仲話好想快D買齊D BB 野. 你話BB係咪有重神秘既魔力呢?! 好多人都話: 當你見到D咁可愛既細路仔一日一日長大係最人生最開心既事! 唔知係咪真, 到我如果有機會做爸爸既時候再話比大家聽!

Scan10022

http://www.fotop.net/dow/cnyahchu09

LP 美女廚房 ~ Chloe & Toby

最近同好多新婚既朋友傾開計, 原來大部分人夜晚個餐都係出街食, 平均消費都唔低, 有D可能一晚要一百蚊一個人. 錢都係其次, 健康反而更重要, 出去食通常都好味精. 不過鬼唔知阿媽係女人, 放工鬼死咁夜, 邊夠時間煮.

所以Rebecca尋晚就親自授徒, 教兩位靚女Chloe同Toby煮一D簡單既家常便飯, 今次菜色有 :

– 糖醋排骨
– 日式鮮茄彈牙意粉
– 秘制焗豬仔脾
– HP茄汁煎蝦碌
– 泰式蒜香粉絲蝦煲
– 日式鹽燒牛扒
– 足料老火靚湯
– 梳夫理

全部都唔係D好複習既菜色, 大部份可以好短時間搞得掂. 我同Rebecca都有個共同目標: 好想大家就算唔能夠晚晚煮 (我地都唔係, 因為我地都夜放工, 同埋都要出去食下, 試下D新野同埋食下人地D環境), 但係weekend或者特別既日子, 大家都可以自己煮, 自己去街市或者Citysuper/Sogo/Jusco, etc. 買下野, 可以慳返DD (真係可能DD, 因為街市都唔平), 不過可以健康D, 同埋最緊要係煮野食可以增進大家既感情, 個份心意係用錢買唔到既, 你話係咪?!

P.S. 大家結咗婚或者準新娘, 如果都想學煮返幾味, 不妨上去我度玩下啦!

IMG_8045IMG_8110 IMG_8145

我都有教大家煎牛扒, 雖然普普通通, 但係勝在平過出去食!

http://dow.fotop.net/lpkitchen09

更驚喜的生日派對

今次C&A又有新驚喜, 今次比上次上我屋企激十陪. 我地今次夾埋好友肥西個女友, 係肥西返屋企前全部隊員上晒佢屋企, 跟住男一邊就”呢”埋係廚房, 女一邊就”呢”係佢書房. 我地預備好蛋糕, 唔出聲息晒D燈等佢返屋企, 全部過程拍抵晒.

等咗成十幾分鍾, 尿急都唔敢出去, 跟住聽到有聲佢返屋企, 佢隻貓貓就好乖咁迎接佢, 最正既係佢冇開燈, 完全唔發覺我地就直去廁所, 原來係換衫, 仲除咗條褲, 點知搵唔到褲著, 跟住就冇著褲咁諗住去書房搵褲著, 點知一開門, Rebecca扮精子嚇佢, “嘩嘩嘩….” 好大聲既叫聲, 全部女仔走晒出去, 佢勁驚, 真係嚇到佢彈起, 一時情急下仲捉住Rebecca, 笑死人, 我地C&A笑到停唔到, 一齊睇番條片, 睇極都仲好好笑, 我估呢單野最少笑十年.

P.S. 因為個人私隱既問題 (同埋有三級打唔到格仔), 所以剩係C&A會員係facebook先睇到, 大家唯有自己幻想下!

P1050433

P1050443 P1050448

http://dow.fotop.net/jordanbday09

年初三的驚喜

今年新年真係多節目, 初一拜年睇戲, 初二食飯睇煙花, 諗住初三應該冇咁多野搞, 朝早先放咗人飛機冇去到打籃球, 跟住就去咗IBM老友Manson既新屋玩大富翁, 好耐冇玩啦, 覺得好好玩, 不過而家呢隻玩法有d唔同以前, 好似講數多過運氣!

返到西環, “叮噹”, 有人按鍾, 一開門剩係見到幾箱野, 跟住開門見到成斑c&a嘩鬼上晒我屋企拜年, 真係大驚喜, 初三流流! 大家都知我屋企唔係大, 所以冇full-team上去我度, 不過都已經好開心好幸福, 有好多禮物, 有卡樂b薯片(阿基送), 有三角(蛇仔), 有唔洗洗既日本米(麟), 最後係有一箱, 係一箱既利賓納仔仔, 企咗係度, 真係可以飲足成年!

跟住就玩Wii (去親人屋企都會玩既野), 玩到大家都冇晒貨就去咗暢遊西環, 應該大家都好小去, 西環上環既街同鋪頭係有d特別既. 其實西環有好多好野食, 不過呢度既傳統係過年放好多日, 所以最後去咗森美度食扒, 普普通通啦, 下次同c&a再去食d西環既正野!

IMG_7823 P1050411IMG_7993 IMG_8009

http://fotop.net/dow/cnyfireworks09

http://fotop.net/dow/cnacny09

IT人都可以好天真

由第一份工做Progammer, 轉眼間都已經做咗十年IT, 一直都冇轉過行, 原因好簡單, 因為我唔做IT都冇其他野可以做 🙂 不過其實都有一個好重要既原因, 就係我以前經常轉工, 又成日去唔同客度做野, 好好彩, 識到好多好傾既戰友同好朋友, 特別係COL同XML既最深刻同對我影響最大, 仲記得一齊去捱夜, 一齊出TRIP做野, 一齊係公司偷懶打波, 一齊扮晒做野但係其實睇緊VCD, 呢D經歷係我腦海裡諗返都係好開心. 雖然大家都已經唔係一齊返工, 各有各忙, 有好多都已經做晒高層, 但係而家有時諗返以前既野, 真係好似阿GILL咁講 “我承認我以前好天真”, 但係就係呢份天真令大家建立咗一份好好既友誼, 我真係要好好珍惜!

P1050137
COL 同事食LUNCH
 P1050145
XML 同事食 DINNER (ZENO 返香港)

http://fotop.net/dow/xmldinner09

非常充實的一天

上星期六公司搞Team Building, 地點係粉嶺既浸會園, 講真, 知道個目的地既時候我真係有D保留, 我住西環, 我諗都要成粒幾鍾, 好彩最後有人車, 咁都冇咁辛苦. 做咁多年都未試過呢D野, 所以都想試下, 同埋成Team既感情不嬲都好好, 一家會玩得好開心.

當日天氣真係超好, 又唔凍, 又有太陽, 早上做下運動, 好舒服. 跟住下午分咗隊後就開始激, 連玩十幾個遊戲, 不停, 全部都係體力勞動既, 雖然真係幾辛苦, 不過成Team好團結, 好一致, 完全見到Team Work, 雖然最後唔係最高分, 但係我見個個都好開心! 心諗咁既經濟有得玩呢D野真係唔話得!

玩到六點, 跟住再由粉嶺去咗西貢, 冇錯, 係西貢, 真係走晒成個香港, 因為去搵老婆, 去咗阿GRACE屋企同埋一班CPCNet以前既同事BBQ, 好耐好耐冇見, 好有意思, 因為佢地睇住我同Rebecca係公司相識到拍拖….Hee…Grace屋企好得意, 好有田園FEEL, 如果可以有時住下郊外地方都唔錯 🙂 不過叫我長住就咪搞! (好怕D蛇虫)

P1050081 P1050134 P1050130

http://www.fotop.net/dow/tdcteambuild09

http://www.fotop.net/dow/gracehomebbq2009

除夕瘋狂派對

今年既除夕雖然要返工, 但係個心已經去咗玩, 一於唔好比佢停, 搞番個屋企派對先. 以往都會係聖誕節同屋企人, 今年一於叫三五知己 (地方細, 真係只可以三個人), 放工上去我度玩個夠. 睇番我結婚當日既片, 真係睇親都好想笑, 睇返C&A既兄弟表演真係一流. 跟住當然有食rebecca預備既野食啦, 拆禮物啦, 食Cookies啦 (寫咗好多搞笑字係上面), 又玩層層疊, 又玩 Wii, 差唔多十二點就去咗西環第三街倒數, 因為個度睇到IFC, 所以諗住可以睇到煙花, 出奇地竟然都幾多人一齊睇, 好開心, 最後又食糖水, 玩到兩點幾, 真係唔想走呀! 新一年祝大家有情人終成….

IMG_7570IMG_7678IMG_7675 IMG_7621 IMG_7546IMG_7642

C&A 通頂聖誕派對

真係好耐冇試過玩通頂, 聖誕節正日C&A籌備咗一個盛大既聖誕派對, 叫做盛大既原因係今次都算係好齊人, 仲全部帶晒女友出席, 真係好緊張. 因為蛇仔同女友Candy搬出去元朗新居, 所以今次上去搞party + BBQ 順便參觀. 感覺好似細個我地一齊去塘福Camp咁.

為咗今次, 我地都好早預備, 又要買禮物啦, 又要包手信啦 (仲要搞抽獎), 又要買新屋禮物啦 (買咗好多焗蛋糕既用具比Candy), 又要預備睇番我結婚當日既片, 最後仲要預備阿狗既生日蛋糕同其他小食, 真係好忙呀, 不過真係好好好開心. 當晚簡直係瘋狂, 大家都大叫大嗌, 好鬼HIGH, 我地抽獎既禮物好搞笑, 有D仲要係成人用品, 唔知合唔合用, 不過真係好搞笑, 開心到不得了! 唔知下次再搞PARTY係幾時呢, 最衰我地西環既屋企唔夠大啦 (要容納廿幾人真係有D難度), 如果唔係一定叫晒佢地上去開P, 不過新年上去拜下年就當然走唔到啦! 快D到下次啦 🙂

P1040717P1040638P1040619 P1040680 P1040683

http://www.fotop.net/dow/cnaxmas08

我們結婚了 Part I

自婚禮後都有成兩個星期冇update個blog 雖然facebook都可以share相同埋想講既野, 不過都係比較鍾意係自己個blog寫下自己既感受, 所以大家多D上去睇啦!

講返婚禮當日, 其實都算順利, 前一晚我獨守西環屋企, 而REBECCA就同佢阿媽係酒店訓. 都打定輸數實緊張到訓唔到, 點知十一點就訓鬼咗, 跟住由十二點直到兩點都有朋友八掛打電話比我, 最後搞到冇覺好訓, 五點就起身!

朝早接新娘就真係超超超開心, 原因係C&A兄弟團到齊, 一班識咗廿幾年既好友全部都好開心又好準時咁係酒店等我. 上去前仲影咗C&A既兄弟合照, 真係好小咁齊人, 仲要個個著晒老西咁, 有D仲要請假先到, 真係唔話得! 睇下, 大家都好有士氣!

photo4

玩新娘既時候就更加係氣氛推至高峰, 兄弟姊妹全部有成廿幾人, 成間酒店房間迫實晒, 勁熱鬧! 姊妹團好幫手, 預備咗都好多遊戲, 有”用腳夾波子”, “即場煮omlete蛋”, “長飲汽水”, “食怪味冰”, “聞嗅襪” 等等, 早知就係玩到傻晒. 係呢度真係要再一次多謝C&A同所有兄弟姊妹, 大家真係好投入, 好正, 勁幫得手! C&A兄弟就果然係好勁, 所有野都同我頂晒, 完全冇人有猶豫, 個個都博晒命, 果然係真兄弟. 見大家都玩得咁開心, 我都真係好開心, 最開心就梗係最後可以順利接到新娘啦!

photo5   

玩完就到戲肉, 上去EDEN園婚禮場地, 由於太早既關係, 前一PAIR新人再行緊禮, 未可以進場, 但係真係太多朋友比面, 估唔到真係有咁多人到, 仲要大家都係早到, 好彩出面有個位可以早D影張相, 差唔多有成百人係出面等緊, 都幾混亂. 好彩早咗十五分鍾可以進埸, 個場都夠大, 兄弟姊妹們又幫手招呼賓客, 最後應該大家都有位坐.

花女grace就發揮得好好, 果然有訓練, 不過花仔小生就…行咗兩秒唔夠就跑咗去睇電視, 等我仲買咗最新既BUS比佢. 當日真係好好好多朋友到, 有好多仲要係好耐冇見, 有D係外國特登到, 又有D係請假到, 仲有好多同埋老公仔女一齊到 (大家都知我鍾意小朋友), 大家對我地咁好, 真係開心到不得了, 個一刻真係感動到想….

DSC_1156

當日仲播咗兩條MOVIE, 其中一條八分鍾既係我自己做既, 真係都用心做咗好幾個星期, 一打風就唔出街, 雖然冇出面街咁可以有好多好勁靚既Effect, 不過都已經好努力. 唔知大家覺得點呢, 我自己係出面度睇唔到d反應, 唔知大家會唔會覺得太長太悶呢,  Hope ok! 好想話心大家聽我地經歷咗好多, 同埋好多好朋友祝福好開心既感覺. 下面有得重溫.DSC_1142

我當日真係冇預備要講野, 一時間都唔知講MUG, 我不嬲對人講野都好小咁緊張, 所以最後只係口快快咁講出個一刻既心情, 同埋一D擺係心底既說話 (講到亂晒:P).

仲有真係要特別嗚謝好友阿Bill, 佢做司儀做得好好, 冇佢真係搞唔成, 得一個鍾要影成百幾人既相, 真係唔易, 佢真係幫到手, 好多謝佢! 下次你結婚, 我一定會幫手.

DSC_1179

一個鍾既時間好快過, 雖然真係冇MUG時間同所有朋友傾下計, 有D趕鴨仔FEEL, 但係見到大家可以影張相同到我既婚禮, 祝福我地已經係超開心! 多謝咁多位, 逐一出去食飯再傾啦!

下面有D先睹為快既相share:

http://www.fotop.net/dow/weddingday

婚禮當日播出既八分鍾短片:

結婚禮物

雖然距離我既大日子仲有成個星期, 不過好多好好既同事已經急不及待送結婚禮物比我啦. 其實經濟唔好, 都唔想大家破財, 不過大家都好有心, 真係好感動. 我冇擺酒, 其實大家親身到賀已經係最窩心既禮物. 聽講當日係超多人結婚, 可能好多人都唔得閒到, 剩係我自己呢兩日都要去飲就知有幾旺, 到時見啦咁多位!

P1010841P1010840

P1010842

我公司個位, 其中一個CORNER, 有朋友親自設計既wedding card, 又要叮噹水晶! 勁開心!

籌備結婚 Part XVII ~ 兄弟姊妹

結婚日子開始埋身, 不嬲懶懶閑既我地想唔搞都唔得 (人就係咁). 開始要搵D朋友出去食下飯比下請貼, 仲有最重要既係朝頭早接新娘既兄弟姊妹. 約咗廿年死黨C&A出去食飯, 順便比埋RUNDOWN佢地, 大家一睇, 嘩一聲, 大家都問”得一頁JA? 咁小野既? 我全日得係搞一樣野?! 仲要十點幾先開始” 梗係啦, 我都算係咁, 好多野都都冇搞, 至少唔使要買椰子呀, 回門呀, 諗起呢D野都想嘔! 搞結婚最怕就係呢D冇意思既傳統儀式. 各位, 到時早D到迎戰呀! 開門利是等緊你!

P1010655 P1010654 P1010660

可愛的樂B

今日約咗好友兼美孚老街坊”珈妹”去HIGH-TEA, 其實最想就係見下佢個仔”Lok B”. 上次見佢都係好細好細既BB, 幾個月就已經唔同晒, 好大隻, 好好玩, 眼仔大大咁. 去咗McDonlads見到人地開生日會就係咁笑, 咁死咁得意. 仲識同人地Bye Bye. 原本想叫阿小生一齊去玩, 點知佢返咗Playgroup後就病咗, 可能轉天氣啦, 擔心死我…快D好返啦, 下星期再返美孚同佢玩. 仲要同阿媽去買結婚當日既衫呀. 好忙, 不過係開心既!

P1010634

http://www.fotop.net/dow/lokbhightea08

叮噹 ~ 生日快樂

九月三日係叮噹 (哆啦A夢) 既生日. 佢幾多歲我就唔知啦, 因為其實佢係2112年出生. 我好好既日文老師 Cammy 佢係上次日本返香港既時候就係日本買咗個 “叮噹人形公仔” 比我. 係一PAIR既, 一睇就知到佢比我結婚既禮物, 好開心, 好靚, 因為香港買唔到. 香港人鍾意叮噹既熱潮已過, 但係日本就不停都有新野出. 真係好懷念幾年前旺角CTMA既一間專買叮噹既SHOP, 雖然老闆好串 (我係佢做串串), 但係次次去佢間野都好開心. 唔知我可唔可以開返間同各叮噹FANS交流下?!

 IMG_5886

第一次飲俄羅斯 Vodka

上星期四搵好友Yvonne同祖欣食晚飯,都好耐冇見,所以想搵個特別D既地方傾下計。女友介紹一間係中環閣麟街既食俄羅斯野既餐廳。我就真係未試過,去到個環境都OK,有Live Band,野食都好特別。食食下,老闆Ivan好nice,幫我地影影下相,就問我地飲唔飲酒,佢話佢請客。請既唔係普通酒,係超勁既Vodka, 40%, 仲叫我地去佢個特別製既雪裡面飲同影相,個度成零下十幾度,要著"ming"先掂,感覺好特別,野食又ok, 又唔係貴,推介!
SNC14646  SNC14645

http://www.fotop.net/dow/russiandinner08


Latest Updates

My Calendar

July 2022
M T W T F S S
 123
45678910
11121314151617
18192021222324
25262728293031

Category

Facebook Badge

Dow Chen's Facebook profile

Contact Me

MSN/E-Mail:dave@dow.com.hk
Web:http://www.dow.com.hk

Bookmark this site by QRCode:

All rights Reserved 2007-2008