Archive for December, 2008

C&A 通頂聖誕派對

真係好耐冇試過玩通頂, 聖誕節正日C&A籌備咗一個盛大既聖誕派對, 叫做盛大既原因係今次都算係好齊人, 仲全部帶晒女友出席, 真係好緊張. 因為蛇仔同女友Candy搬出去元朗新居, 所以今次上去搞party + BBQ 順便參觀. 感覺好似細個我地一齊去塘福Camp咁.

為咗今次, 我地都好早預備, 又要買禮物啦, 又要包手信啦 (仲要搞抽獎), 又要買新屋禮物啦 (買咗好多焗蛋糕既用具比Candy), 又要預備睇番我結婚當日既片, 最後仲要預備阿狗既生日蛋糕同其他小食, 真係好忙呀, 不過真係好好好開心. 當晚簡直係瘋狂, 大家都大叫大嗌, 好鬼HIGH, 我地抽獎既禮物好搞笑, 有D仲要係成人用品, 唔知合唔合用, 不過真係好搞笑, 開心到不得了! 唔知下次再搞PARTY係幾時呢, 最衰我地西環既屋企唔夠大啦 (要容納廿幾人真係有D難度), 如果唔係一定叫晒佢地上去開P, 不過新年上去拜下年就當然走唔到啦! 快D到下次啦 🙂

P1040717P1040638P1040619 P1040680 P1040683

http://www.fotop.net/dow/cnaxmas08

Advertisements

去很多地方的平安夜

今年平安夜雖然最後都冇得早放工, 不過我地都準時係CWB會合 (我部新買既Nokia 5800用咗兩日就壞咗去維修), 跟住就食好掛住既拉麵 Sapanchi, 真係好, 冇人唔使等位. 跟住就去咗旺角睇 “荒失失奇兵2”, 可能最近都好夜訓, 明明套野都幾好笑, 我地兩個都訓著咗一陣. 跟住就出發去TST湊熱鬧, 嘩, 都好多人, 不過聽講D人去晒廣東道, 所以都OK. 其實都只係想影下相, 行下, 熱鬧下, 不過燈熄就真係好唔得, 比上幾年真係差得多, 冇MUG FEEL, 最後去食唔使錢HaganDaz, 去坐船返中環, 好開心, 好Relax既一個平安夜, 不過就走晒香港Kowloon, 都幾腳痛!

IMG_7403IMG_7404IMG_7482

IMG_7416IMG_7446 IMG_7495IMG_7522 

http://www.fotop.net/dow/christmaseve08

聖誕樹與自製薑餅

今年既聖誕節同往年都有我最喜歡既聖誕樹, 今年個SIZE同上年差唔多, 不過就多咗好多吊飾, 有係英國Harrods買既, 又有今年7仔大熱既叮噹, 仲有上年買既, 一年比一年多. 下年可能要買棵大D既, 大家覺得靚唔靚呢?! 我晚晚返到屋企都會熄晒D燈, 望住佢閃吓閃吓咁, 好開心GA, 好有節日氣氛同浪漫.

IMG_7363

今年Rebecca仲學人自製薑餅, 唔知好唔好食呢?! 你想唔想試下?!

IMG_7372

Honeymoon ~ Part II 法國

一去到法國比我第一個感覺係好冇安全感, 完全唔知點行, 冇英文都算, 地鐵又臭, D人又好恐怖咁, 個個好似”搵飯食”咁, 同英國好唔同. 搞咗成個鍾, 終於搵到間酒店, 梗係冇得同倫敦個apartment比啦, 不過都算乾淨同新.

好緊張呀, 所以急不及待就出去啦, 當然係去最出名既香謝麗舍, 仲有Christmas既fun-fair, 好多野睇, 好開心, 香謝麗舍真係好靚, 好特別. 係英國都冇mug食好野, 到法國一於全部食豪D, 去睇驗吓當地人食野既地方. 搵咗間好正推介既local餐廳叫做”Chartier”. 晚晚都好多好多人等位, 又便又好食, 我地去到encore咗兩次. 仲有食咗一直都冇試過既青口, 好好味呀, 同香港既完全係兩回事, 終於明白點解咁出名. 食呀食, 你會覺得係法國食野雖然都幾貴, 不過真係值得試! 好彩我地有”十分鍾學好法文既書”, 有佢就知點叫野食啦.

除咗正餐外, 仲有出名既macaron小圓餅法國甜點. 其實未去前Rebecca係香港已經係對佢瘋狂, 我成日都係IFC買LGB個間TUM佢開心. 去到Paris, 有最出名既LADURÉE, 直頭傻咗. 又去買佢地既Shopping Bag又狂食佢地既餅同麵包, 不過都唔夠D日本妹勁, (其實好似Tokyo都有一間, 唔明點解會咁瘋狂). 仲有當地最出名既PAUL麵包 baguette 等等.

當日既exchange rate係$9.8, 唔買LV都對唔住自己啦, 連Rebecca咁慳既都忍唔住, 我當然都有買啦, 仲好多TIM, 破財啦今次, 不過D日本人先勁, 一掃就十個八個, 買咁多唔通個個都係炒家?!

除咗食, 仲去咗好多好多地方, 好凍好凍, 但係停唔到, 日日都好似去咗做苦功咁, 勁辛苦, 不過都係好開心, 好浪漫, 第一次見到Le Tour Eiffel, 藍色發光(因為歐盟慶祝), 仲有幾粒星星閃閃, 好靚, 行上去一半, 跟住仲上到最高, 好凍 (零度), 但係好靚, 感覺好特別.

仲有去咗幾個好地方, 如凡爾賽宮, 天氣好好, 我地人生既第一次見到7色齊晒既彩虹, 仲有係Paris Opera House聽我好鍾意既Magic Flute, 歌又好聽又唔悶, 雖然票真係好貴, 但係人生總要一次. 仲有去咗一D都唔好玩既Paris Disneyland. 相信大家都聽唔小佢D唔好野, 唔使我多講. 最後仲去咗夜總會LIDO睇SHOW食FINE-DINING, 一路睇性感 SHOW (係好性感, 因為好多係冇上衫) 一路飲香檳, 你都咪話唔正! Hor Hor.

總結今次法國同英國既旅程, 我覺得係好順利同開心, 好多我地既第一次, 一個好難忘既經驗, 下次想去Swiss同Italy 🙂 唔知幾時有機會呢!

P1030863P1030839P1020786P1030508P1030564

P1030493P1030596P1030980

 P1030688P1020993P1030821

  P1040176P1030918

Honeymoon ~ Part I 英國

長達兩星期既悠長Honeymoon終於完咗. 今次我地去咗英國法國兩個地方, 好多我地既第一次, 第一次去歐洲, 第一次放咁耐假, 第一次見到彩虹, 等等….所以特別開心同興奮.

今次英國主要係去倫敦周圍去同埋shopping, 當然都有去近郊如劍橋, Greenwich. 一去到倫敦, 最有Christmas氣氛既就係氣溫, 雖然已經打晒底, 但係接近零度既溫度, 真係頂唔順, 好唔慣. 好在今次住係公司既apartment, 出奇地又平又新又大又乾淨, 又係勁方便勁貴既May Fair Hyde Park隔離, 仲有公司既人好好招呼, 好快就可以出動.

十二月既英國日落時間係四點正, 真係一到四點就黑晒, 其實都幾冇隱, 所以一早就起身, 跟住就出發, 通常都唔食lunch, 因為一食就冇日頭可以影相. 同埋可能真係好凍既關係, 次次返去都成身散晒! 不過都好好彩, 都有d藍天, 去咗一D必去既景點, 影咗好多靚相,  去博物館呀, 教堂呀, 大笨鍾, 白金漢,  覺得自己大開眼界好開心! 仲有最開心既就係可以睇咗兩套musical, Lion King同 Billy Elliot, rebecca 冇訓覺, 證明都唔錯 : P

英國食野就真係得個貴字, 一早已經plan好留返D彈藥去法國先fine-dining, 所以我地大部分時間都係係馬沙狂買一D我地係香港唔係好捨得買既野食, 好似prama ham, 好新鮮既salad同mushroom, etc. 買晒返apartment自己煮, 朝早仲自己煮 english breakfast, 都好鬼好食同有feel.

成個旅程去得最多既竟然係一間英國既連鎖賣衫既shop, rebecca好似傻咗咁, 因為christmas sales, 真係好平, 嘩…買到停唔到, 仲有要答謝C&A兄弟既幫手, 係一間運動衫店 SportsDirect 買咗好多手信比佢地, Yeah! 當然英國必買既Harrods就唔使多講啦, 同事手信必備.

十幾個鍾頭機周埋D時差, 其實真係留係英國既時間都係五日到, 都算OK, 跟住就去法國浪漫下啦, Part II再講!

IMG_6693 IMG_6765IMG_7023IMG_7202 IMG_7221P1040430 IMG_6848IMG_7213  IMG_6962IMG_6950P1020370P1040333

http://www.fotop.net/dow/honeymoon

我們結婚了 Part II

婚禮完咗後, 全部兄弟姊妹同埋一D好朋友就一齊去飲茶, 大家都辛苦啦, 都應該慰留一下. 我地同攝影師阿BILL就食唔夠一陣就要出發去影相. 去邊?! 梗係我地最喜歡既西上環區啦. 去咗上環海邊, 又去咗佢既母校救恩堂, 仲去咗鬼屋TIM, 想搵D特別D既地方影結婚相, 個日天氣普通唔係有籃天個隻, 要睇攝影師阿BEN既技術同風格啦. 下面有幾張SAMPLE, 唔知大家覺得點呢?! 我就幾鍾意, 因為同台灣既完全唔同STYLE! 比D意見啦!

photo15

 photo11 photo10photo14

接近黃昏, 就急急腳返會展皇朝會屋企人擺酒, 好多親戚朋友已經到咗打牌, 又要針茶, 冇停啦, 不過都好開心, 因為小圍數既關係, 可以多D同親戚吹下水. 仲有最正既係, 十點就食完, 我地十點半就返屋企, 不停有朋友打電話祝福, 好開心既一日!

Family1_photoshop

再一次多謝咁多位, 真係好開心得到你地既祝福, 願你地都ENJOY我地既婚禮啦, 告一段落!

我們結婚了 Part I

自婚禮後都有成兩個星期冇update個blog 雖然facebook都可以share相同埋想講既野, 不過都係比較鍾意係自己個blog寫下自己既感受, 所以大家多D上去睇啦!

講返婚禮當日, 其實都算順利, 前一晚我獨守西環屋企, 而REBECCA就同佢阿媽係酒店訓. 都打定輸數實緊張到訓唔到, 點知十一點就訓鬼咗, 跟住由十二點直到兩點都有朋友八掛打電話比我, 最後搞到冇覺好訓, 五點就起身!

朝早接新娘就真係超超超開心, 原因係C&A兄弟團到齊, 一班識咗廿幾年既好友全部都好開心又好準時咁係酒店等我. 上去前仲影咗C&A既兄弟合照, 真係好小咁齊人, 仲要個個著晒老西咁, 有D仲要請假先到, 真係唔話得! 睇下, 大家都好有士氣!

photo4

玩新娘既時候就更加係氣氛推至高峰, 兄弟姊妹全部有成廿幾人, 成間酒店房間迫實晒, 勁熱鬧! 姊妹團好幫手, 預備咗都好多遊戲, 有”用腳夾波子”, “即場煮omlete蛋”, “長飲汽水”, “食怪味冰”, “聞嗅襪” 等等, 早知就係玩到傻晒. 係呢度真係要再一次多謝C&A同所有兄弟姊妹, 大家真係好投入, 好正, 勁幫得手! C&A兄弟就果然係好勁, 所有野都同我頂晒, 完全冇人有猶豫, 個個都博晒命, 果然係真兄弟. 見大家都玩得咁開心, 我都真係好開心, 最開心就梗係最後可以順利接到新娘啦!

photo5   

玩完就到戲肉, 上去EDEN園婚禮場地, 由於太早既關係, 前一PAIR新人再行緊禮, 未可以進場, 但係真係太多朋友比面, 估唔到真係有咁多人到, 仲要大家都係早到, 好彩出面有個位可以早D影張相, 差唔多有成百人係出面等緊, 都幾混亂. 好彩早咗十五分鍾可以進埸, 個場都夠大, 兄弟姊妹們又幫手招呼賓客, 最後應該大家都有位坐.

花女grace就發揮得好好, 果然有訓練, 不過花仔小生就…行咗兩秒唔夠就跑咗去睇電視, 等我仲買咗最新既BUS比佢. 當日真係好好好多朋友到, 有好多仲要係好耐冇見, 有D係外國特登到, 又有D係請假到, 仲有好多同埋老公仔女一齊到 (大家都知我鍾意小朋友), 大家對我地咁好, 真係開心到不得了, 個一刻真係感動到想….

DSC_1156

當日仲播咗兩條MOVIE, 其中一條八分鍾既係我自己做既, 真係都用心做咗好幾個星期, 一打風就唔出街, 雖然冇出面街咁可以有好多好勁靚既Effect, 不過都已經好努力. 唔知大家覺得點呢, 我自己係出面度睇唔到d反應, 唔知大家會唔會覺得太長太悶呢,  Hope ok! 好想話心大家聽我地經歷咗好多, 同埋好多好朋友祝福好開心既感覺. 下面有得重溫.DSC_1142

我當日真係冇預備要講野, 一時間都唔知講MUG, 我不嬲對人講野都好小咁緊張, 所以最後只係口快快咁講出個一刻既心情, 同埋一D擺係心底既說話 (講到亂晒:P).

仲有真係要特別嗚謝好友阿Bill, 佢做司儀做得好好, 冇佢真係搞唔成, 得一個鍾要影成百幾人既相, 真係唔易, 佢真係幫到手, 好多謝佢! 下次你結婚, 我一定會幫手.

DSC_1179

一個鍾既時間好快過, 雖然真係冇MUG時間同所有朋友傾下計, 有D趕鴨仔FEEL, 但係見到大家可以影張相同到我既婚禮, 祝福我地已經係超開心! 多謝咁多位, 逐一出去食飯再傾啦!

下面有D先睹為快既相share:

http://www.fotop.net/dow/weddingday

婚禮當日播出既八分鍾短片:


Latest Updates

My Calendar

December 2008
M T W T F S S
« Nov   Jan »
1234567
891011121314
15161718192021
22232425262728
293031  

Category

Facebook Badge

Dow Chen's Facebook profile

Contact Me

MSN/E-Mail:dave@dow.com.hk
Web:http://www.dow.com.hk

Bookmark this site by QRCode:

All rights Reserved 2007-2008

Advertisements