阿豆新CD推介

最近係公司日日都係做消防員救火, 雖知要有效地救火, 先要有清晰既頭腦先得. 人人減壓既方式都唔同, 我就會選擇聽歌, (係公司我真係會聽足一日iPod). 正因為我鍾意聽既曲式都幾廣泛, 所以一個月剩係買CD既錢都唔小野:( 今個月我想推介幾隻新CD比大家, 有興趣既可以問我借 (雖然全部係HMV都有得買)

絢香 BEST ALBUM 2006 – 2009

絢香係日本好紅, 佢一出道第一首歌"I Believe”我已經迷上佢既歌聲, 佢好有POWER既聲音, 同埋好多曲都係佢自己作, 所以唱得特別有感情. 最近佢結婚, 又宣報有病, 所以要暫休, 唱片公司所以就狂搵錢出CD, 呢隻BEST ALBUM好似有D掠水, 不過大家未聽過佢既歌就買得過, 仲有得抽獎, 抽中咗可以係日本睇佢最後MTV UNPLUGGED CONCERT.

坂本 龍一, Out of Noise

坂本 龍一 唔需要多介紹, 日本國寶級既音樂教授, OSCAR呀GRAMMY都獲獎, 即正令日本人打出外國. 我細細個我二哥已經封佢做偶像, 日聽夜聽, 佢既電子音樂真係行前人幾步. 今次呢隻2xCD, 唔使$100, 抵到冇人有, 有我最喜歡既"末代皇帝" 同 “ Merry Christmas Mr. Lawrence” 既PIANO VERSION, 仲有新曲用鋼琴融合管絃樂，以及種種來自北極圈大自然當地聲音為主，好令人感動! 推介!

Chris Botti In Boston

美國「People」雜誌「全球五十大美男子」Chris Botti 做卓頭, 呢D野我就真係冇興趣. 我鍾意Chris Botti既原因好簡單, 因為聽佢既CD唔會悶, 有時聽SAX, 好似KENNY G, 因為太RELAX, 所以會訓著. 佢既好處係利用佢既SAX同不同曲式如Jazz, Orchestra, Pop , Bossa Nova, Acoustic等既融合. 今次呢隻LIVE仲有好多大明星支持演出, 仲有DVD送, $119, 真係唔錯! 當中有我係結婚片段用既主題曲"Le Continental”, 對我好有意思ga!

  Laura Fygi ~ Songs from Movies & Musicals

聽Jazz人人都會識Dianna Krall, 不過我就會選Laura Fygi, 因為佢低沉既聲音, 令我更加鍾意佢, 聽講荷蘭人同佢個名以她為名的一種新品種鬱金香, 真係好浪漫:) 今次呢隻新CD係唱一D大家耳熟能詳既曲目, 全部都係一D經典既電影同MUSICALS既歌. 大家如果係初初學聽JAZZ, 又唔想聽D未聽過既咁悶, 不妨試下呢隻!

我仲有好多好CD推介, 下次再講! (屋企已經冇位放CD

C&A又有喜事 ~ Cherry & Jordan

C&A喜事一浪接一浪, 今次到Jordan同Cherry. 佢地兩個拍咗拖差唔多八年, 八年真係一個唔短既時間, 想像一下, 假如佢地日日都見面, 差唔多對住大家三千日 (Hee…Hee..明白感情係唔可以用理性數字去量度同計算  

今次一如以往, 我地C&A全部做晒兄弟, 雖然唔係第一次, 不過唔知點解, 我都係有D興奮緊張, 可能係眼見C&A人人都搵到真愛, 感覺特別感動安慰. 特別係在教堂, 聽見大方得睇到不得了既CHERRY講既一番說話, 更令我感動無比感動, 佢發自內心既說話, 真正打動全部人, 感覺到佢有多幸福!

當日個Rundown都幾緊密, 由朝早8點開始就冇停過, 所以大家都有D疲勞, 不過我地都為JORDAN諗咗一個驚喜送比CHERRY, 真係好"即興", 阿麟同阿基真係唔話得, 果然夠兄弟, 特登走返屋企拿結他, 即時係酒店彩排, 最後佢唱咗一首"唯獨你是不可取締", 雖然唔記得歌詞, 不過呢D唔重要, 最正既係CHERRY完全唔知情, 呢D先叫驚喜:) 一定好難忘! 當晚我負責做司儀, 講真我已經幫好多朋友做過, 都叫做有D經驗, 不過今次既Partner係Rebecca, 感覺比較新鮮, 講真當晚都有D緊張, 原因係唔想失禮佢D客人, 好彩都冇講錯野, 如某人的花名.

眼見雙方媽媽眼濕濕咁睇住自己個仔女結婚, 絕對感受到佢地有幾感慨, 對於父母, 結婚算係一個養育生涯其中一個階段既完結, 不過對於Cherry同Jordan係一個新生活既開始, 我願佢地日日都Sweet Sweet, 無論發生什麼事, 只要兩個人在一起, 都係咁幸福快樂!

 

http://www.fotop.net/dow/jordanwedding

第一次去愉景灣

成日都聽人講話"愉景灣"好浪漫, 有個靚海灘拍拖就最正, 但係其實咁多年我都未去過. 今個星期日終於有機會去, 不過唔係兩個人, 而係同小生一家去玩! 原本可以坐船由中環去, 不過想同小生一齊入去, 所以由東涌出發坐SHUTTLE, 都坐咗幾耐, 感覺有D似STANLEY, 又有D似黃金海岸, 係海灘同小生玩搖控機, 好開心, 好舒服又RELAX既一個下午, 推介拍拖浪漫一流, 大家可以考慮下! 我仲應承咗下次二人世界再去多一次!

北海道浪漫之旅

雖然距離上一次去日本旅行只是幾個月的事, 但係今次北海道之旅比我既感覺同以前去日本, 如東北, 關西等很不同. 日本吸引之處在於四季所見既景色真的很不同, 上一次為櫻花既壯觀而驚訝, 今次為的是感受北海道既大自然, 冇論食物, 花田, 文化, 人等都令我感到好幸福同鍾意呢個地方 (做咗niki?!).

明白很多人會選擇北海道做渡蜜月, 因為對於一對剛結婚sweet既情侶, 揸住車自由自在咁係富良野望住廣闊而藍到冇雲既天空, 富田農場兩邊全是農田同不同顏色既花, 再經過ken&mary tree感受浪漫故事, 當你拖住對方既手, 寧靜地閉上眼既時候只係見到兩隻顏色, 深藍同緣, 呢重感受令你感到整個地方都好似屬於你同佢, 好浪漫!

浪漫都唔可以當飯食, 要醫肚, 北海道擁有天然食品, 足可以自給自足, 所有食品都係極品, 如果你平日有去sogo或者citisuper買餸,你就明有幾開心, 所有平日你唔捨得買既食材, 係呢度只係好普通, 最緊要係價錢都普通. 食咗冇數咁多既籌司同拉麵, 山頭火, 梅光軒, 根室花maru等等, 對於我唔鍾意食白飯既人簡直係天堂.

去了必到既小樽, 浪漫既原因我搵唔到, 可能都係因為韓日劇. 不過我就感受到呢個地方保護建築物既利害, 大家都好團結咁造一個好有懷舊同有特色既小地方! 我地仲花咗兩個鍾既時間一齊做咗個屬於我地既音樂盒, 旅行兩個鍾好像很話浪費, 但浪漫有時係要用時間換取?!

因為有車既關係, 可以去很多地方, 登別望住火山浸溫泉, 完全冇plan行程既情況下, 係便利店買當地旅遊書, 跟當地人去一d唔出名既地方, 去到札幌郊區有一點探險既感覺, 同當地既小朋友傾下計, 感受佢地既天真同家教, 令我想教我既細路都好似佢地咁乖. 浪漫可以係一d回憶, 有回憶深刻, 最好係大家一齊體驗去面對! 我地去咗不同既工廠見學, rebecca鍾意所有關於食品既野, 佢好開心, 但連我都大開眼界!     

最後仲係北海道電視塔前拿燈籠賞月同上山睇夜景. 今次9日既行程令我感受到北海道既浪漫

   

十大"沖涼"金曲

自從大學畢業, 出去唱K既次數寥寥無幾, 就算係去, 都通常係慶祝朋友生日, 冇地方落腳而已. 唔講唔知, 其實我都幾鍾意唱歌, 細個既時候, 一到星期六日朝早, 我就會關埋房門, 跟住開到部HIFI勁大聲, 我就跟住唱唔停, 幾個鍾頭出房門, 心情極為舒暢! 平日有時跟阿哥學下"河車", 又有時會想學"克勤"咁震音既喉嚨會震下震下! 到依家有自己既屋企, 我通常都會唔理老婆既感受, 一路沖涼, 一路唱歌, 大家可以試下, 可以減壓!

咁多年既好歌多到數唔晒 (近年既唔好講), 但係真正做到聽極都唔覺悶, 而次次聽都仲係咁有FEEL既歌其實唔太多, 我就選咗我自己既十大"沖涼"金曲 (我既年代), 如下:

• 願 (林憶蓮 電影『晚九朝五』主題曲)
• 我願意  (黃國倫 演唱既版本)
• 領悟 (辛曉琪)
• 新不了情 (萬芳 『新不了情』主題曲)
• Sol#4 (蘇永康  『陽光檸檬茶』主題曲)
• 眼淚 (范曉萱）
• 幸運是我 (Sammi 99’ Concert 版本)
• 未完的小說 (彭羚 『戀愛1/2』主題曲)
• 心痛 (陳潔儀)
• 沒有你還是愛你 (林憶蓮有兩首, 好明顯係偏心)

我鐘意既大部分都係情歌?! (可能我比較感性, 情歌通常給沉醉愛情的人) 其實人人既金曲都唔同, 當然首歌好唔好聽係關鍵, 不過對我而言回憶先至係緊要, 以上既歌我一聽, 我就會想起一個畫面, 一段故事, 回憶既事有開心有傷感, 呢D先可稱得上為我的金曲! 唔知你地有冇諗起一D屬於你地既金曲呢?! 不妨share下!

P.S. 下次再同大家分享我的十大合唱金曲!

櫻桃小丸子之灰姑娘音樂劇

尋日去咗睇"櫻桃小丸子音樂劇", 你一定會問, 係咪同你D姪女去睇呀?! 答案係我同REBECCA拍住拖去睇. 我同佢係大細路就係人都知, 其實我知道佢好耐以前已經鍾意小丸子, 同埋上次睇過呢個劇團做叮噹好好睇.

但係由於好遲先訂票, 仲有係我唔捨得用四百幾蚊去睇, 最後買咗最平, 坐既位置好前, 不過就好斜, 有D仲唔係幾睇到, 有人當然有怨言, 仲有想講既係D配音, 唔用原裝無記都算, 仲搵咗D所謂明星去配, 配音都可以, 大佬, 音樂劇, 係要唱, 搵阿SA去唱, 唔係掛?! 你當D細路真係冇耳仔?! 過份…算啦, 香港講卓頭! 我見到所有細路都好開心咁DANCE, 我都睇得好開心! 如果我有細路, 我都會同佢去睇!

 

新玩具 ~ PS3 Slim

自從電視台都有高清, 搞到自己隻眼都高要求咗, 大家如果睇開高清, 試下用你部LCD去睇返傳統訊號, 真係幾差勁, 明白人真係不斷進步! 老土既講完, 不嬲我都有買下D Jazz 或者日本明星 Concert 既DVD, 就算我Upscale咗去1080i, 同無線都比不下去, 你話幾唔點, 用百幾二百蚊一隻換來既質素竟然如此?!

所以一直都想買部Blu-ray, 不過要成三千幾(以前), 雖然最近下落到二千幾都有 (唔計大陸牌子幾百蚊都有啦), 都係吸引唔到我買, 因為屋企又冇位擺, 仲有係我冇7.1, 屋企聽開CD得Analog既2.0, 不過最近聽到PS3出新野, 係SLIM版, 仲要Blu-ray有bitstream (for 未來新屋套7.1, dreaming ) 真係幾正! 終於忍唔住 (已經等唔到詢問老婆既批准) 去咗優先訂購, 仲要tee shirt送!

買咗Street Fighter同Sony貓, 感覺都唔錯, 幾好玩, 又有Playstation Store download下D free trail, 最令我嘩然既係一個remote play既功能, 佢可以connect埋我部PSP, 跟住remote部PS3, 仲要係經Internet都得, 即係做咗remote Media Server, 幾正個IDEA, 不過好小聽人講. 仲有係, 屋企可以同Vuze做media server, share 我拍個D AVCHD 既高清片係大LCD度睇, application都幾多, 感覺好似買咗部多multimedia功能既電腦咁, 多野玩, 好似抵D

我部Wii都有玩GA, 最近玩Wii Sports Resort, 太多野玩, 玩唔晒, 要多D留係屋企先得. 最後, 我個PSN ID係dowchen, 大家搵我ONLINE打機啦! 

Decoupage 剪紙藝術

最近Rebecca瘋狂迷上一種剪紙藝術, 個名叫做”Decoupage”. 個名怪怪, 但好多人都有興趣係D MUG野?! 根據WIKIPEDIA, 佢係:

"Decoupage源自於法文剪紙裝飾，將美麗的圖案剪下拼貼於生活中的任何素材中，遠在西元17世紀末，義大利威尼斯的傢俱工匠，為應付大量的訂製需求仿效東方漆器製作原理發展出接近現代Decoupage的裝飾藝術形式。"

我冇去上過正式既訓練, 所有都講唔到太多, 剩係知道大家如果想學既話, 便D, 可以去工聯會, 如果真係再有興趣既, 可以出去拜師學藝再深造 (可以介紹比大家). 當初, 佢去學既時候我都覺得普通, 因為好似只係剪剪貼貼, 好似變化唔係太大. 不過睇完佢比較進階既作品, 我都開似有D興趣, 原來係可以係唔同既Surface做圖案, 仲要除咗餐巾外, 相都可以做, 創意無限! 屋企依家連我個KEYBOARD同度門都有"拉"花, 死未?!

不過始終藝術都係比較花時間既一個活動 (我已經連續好多個星期二夜晚放工都要食自己:) 不過見佢咁比心機一件事, 我一定支持啦, 我係屋企已經”間”出一個專櫃比佢放D用具, (嘩, 原來要買好多野, 顏料, 一支二支, $$都唔小野) 仲有, 佢話係台灣原來係有專業證書課程 (香港未有因為仲未好普及), 見佢有興趣去上. 不過投資真係比較大, 時間又係一個問題, 唔緊要, 我心信只要唔好放棄, 就一定有機會既!

不過最開心係見佢可以做一D製成品送比身邊既朋友當係”比較有心思”既禮物, 而大家so far既feedback都唔錯, 收既開心, 做既自然落力啦!

 

http://www.facebook.com/album.php?aid=70120&id=605699260&ref=mf

同小生去澳門

精彩既WEEKEND真係一浪接一浪, 前一陣子先同C&A去完大陸玩, 今次再同小生我家姐一家去澳門玩兩日. 今次係阿生第一次出香港, 唔知佢心情有冇興奮呢?! (我估都冇, 因為佢都唔知發生什麼事) 坐船途中只係不停咁跑呀跑, 都唔似坐緊船!

今次既旅程主要都係RELAX為主, 因為BOOK咗四季酒店(差唔多二千幾蚊一晚), 所以真係要多D時間留係酒店先得! 好好彩, 酒店好體貼咁UPGRADE咗我家姐間ROOM做SUITE, 因為佢話有個細路WOR, 真係正, 一入去, 大家只係"嘩嘩嘩", 因為真係好大好正, 咁大個仔未試過咁豪! 跟住我地去咗VENETIAN食飯, 又去咗游上, SAUNA, 做下皇帝先啦! 小生都好開心, 唔怕水, 曬到黑晒 (都好, 冇咁肥)

夜晚就去咗睇SANDY演唱會, 我真係好掛住o佢現場既聲音, 差唔多全場都係香港人, 大家都係FANS, 非常投入, 好HIGH, ENCORE咗兩次, 冇他, 大家都掛住佢既聲音, 香港唱得既歌聲數之有小, 望佢唔好咁快退休.

第二日送咗個BUFFET BRUNCH, 多野食到不得了, 小生三歲以下唔使錢, 嘩, 酒店就真係慷慨, 佢估唔到一個三歲未夠既細路, 食糧可以咁驚人, 雖然好開心食得, 不過真係要留意下佢既體重, 太肥啦, 再係咁大個咗都好難減! 有D擔心, 最近呢件事, 成日係我個腦度諗, 不停聽下D現任媽媽意見, 我真係幾有興趣研究下細路仔發展, 要睇多D書先得! 大家一定會話, 快D生番個實踐下先啦……呀…..

下一次既旅行好快就到, HOKKIADOへ いく!

 

http://www.fotop.net/dow/macau09

C&A茵特拉根之旅 ~ 後記

今次C&A茵特拉根既旅程非常順暢, 既驚喜, 又好玩! 我地一行六人 (三PAIR已結婚既C&A人) 難得可以一齊離開香港玩兩日 (自從中學年代去長洲CAMP), 呢D機會唔係咁易有, 多謝發起人KITTY同阿麟. 雖然天氣就熱D, 不過大家都玩得好開心!

我地當日晨早約咗係九龍塘, 大家都好守時, 不過我個鍾唔響搞到最後要坐的士, 唉! 跟住大家就好興奮咁向拉筋進發. 一去到要等車, 已經見到有一斑香港人狂講粗口, 話等咗成個幾鍾狂CALL車都未有車去酒店, 我地心諗, 使唔使咁燥, 我地企一陣, 全身濕晒又多蚊, 明既, 咁等發, 想死, 不過我地"符碌", 轉頭就上咗去地CALL個斑車, Ha Ha!

跟住去到"車房”酒店, 都幾新幾OK, (開咗幾個月唔新就死得啦!) 又見到個斑香港人, 又係度同酒店D人嘈, 今次又話"咁大間酒店得一個經理, 有冇搞錯?!" 我地梗係彩佢地都傻, 快快CHECK-IN上房. 間房都幾OK, 幾舒服.

跟住大家就出動到華僑城搵野食, 死火, 冇車出去既原來, 配套真係一絕, 大家就硬食咁係三十幾度氣溫下行一大段路, 到咗一睇, 完全冇野好食, 間間一係貴到死, 一係就KFC (多人都傻), 最後搞到要食唔好味既快餐店, 算數, 快快食完去玩!

嘩, 眼見成個華僑城, 我諗D地真係唔使錢, 大到不得了, 成個樂園超大地方, 不過指示可以話係冇, 所有野完全係靠你自己搵或者問人, 大家慨嘆中國既野往往都係咁, 有頭威, 冇配套, 唉! 我地去咗好多地方, 花田影相, 坐車游覽, 一條只可以五十人同時過既橋, 餵"一堆"十年冇食野既金魚, 坐CABLE CAR, 夜晚就食自助餐 (丹貴軒), 夜晚再去中國小鎮大街感受美國氣氛, 都幾正!

跟住又遇到另一難題, 又係冇車返酒店, 最後上咗公車, 仲要比人屈咗一人十蚊 (明明係路經), 唉, 算啦, 有車返去都偷笑, 跟住大家一齊玩下大富翁CARD, 吹下水, 食下野, 咁就一日.

第二日去咗"大俠谷", 冇錯, 係"俠", 呢度D野食平好多, 最後食咗PIZZA HUT, 又平又好食, 呢兩日最好既竟然係呢餐, 講都唔信. 我地周圍行下, 影下相, 好耐冇影呢D旅遊一斑人既相, 感覺好特別, 我諗起大學時代去O-CAMP咁. 最後仲玩咗吊索過山車(又係"符碌"唔使排隊), 仲最走咗去深圳坐地鐵去CO-CO PARK食晚飯, 非常盡興同完滿!

C&A幾時再可以衝出中國, 一齊坐飛機去旅行呢?!

大人與細路的暑假

身邊有小朋友既同事最近都放長假期去旅行, 我諗D細路一定勁開心, 唔使返學又有得同爸爸媽媽去旅行做皇帝. 我記得我細個既時候(小學)既暑假當然冇依家D靚仔咁精彩, 屋企唔係有米，而我阿媽好博命搵錢, 忙到傻, 夜晚十二點都要出動簽約, 阿爸就由朝到晚做足六日。四兄弟姊妹通常都係自己顧自己, 我最細, 所以最幸福, 哥哥姐姐都係比最好既我 (做細係好Ｄ）, 不過我都係自己落街買野食, 周圍落街玩，好似街童咁，得閒行下文具鋪 (以前通常都有玩具買).

同埋當時美孚屋企細, 冇mug活動空間, 大哥家姐大我好多讀中學, 佢地會留係屋企好努力咁讀書. 所以通常我都係上去美孚死黨~勁爺同阿麟屋企玩超合金同打機, 玩到夜晚食飯就返屋企, 日日都係差唔多! 有時二哥都會同我去玩, 聽下音樂, 行下通利, 都幾開心! 有時覺得依家既細路既開心多咗用錢買番來，不過時代唔同咗，父母物質要求高咗呢個係改唔到既事實，細路自然受影響，不過但願大家唔好過咗火，忘記咗一家人或者友誼呢Ｄ真正令人開心既Core Value.

今個八月, 我都要好似D細路咁玩玩玩, 因為平時工作真係做不停, 所以已經安排咁多個WEEKEND既節目, 首先係會同好友C&A一齊去因特拉根,華僑城玩番下, 我地個個咁多年死黨, 不過一齊去旅行真係小知有小, 所以我真係好期待今次既旅程. 跟住仲未完, 仲有就係會同我最愛既小生家姐一家人去澳門四季酒店一晚, 靚酒店一定好正, 仲可以同小生去游水, 諗起都開心! 同場仲加影, 去埋睇SANDY LAM既威尼斯演唱會, 勁期待呀! YEAH, 做大人都可以好開心啦

 

北海道紅葉之旅

原本諗住十月去德國瑞士之旅, 因為種種原因最後泡湯, 雖然有一點失望, 不過唔緊要啦, 因為已經決定咗9月尾會去一個較短既Trip, 就係去北海道睇紅葉. 我係CX搵到個幾平既PACKAGE, 仲有埋Staff Price, 住全新五星級札幌酒店, 真係幾唔錯! 好配合我今次想要既旅程, 就係浪漫同Relax. 講真, 結婚後, 可能大家工作都比較忙, 放工後仲各有各忙, 佢就要照顧我既膳食, 我就要讀書同打掃屋企, 大家拍拖時個D浪漫野相對比較小. 好啦, 就親今次呢個機會做番D野先!

可愛的西環

最近放工搭的士返屋企既時候, 成日都見到日落MAGIC HOUR靚到不得了, 連的士司機大佬都"嘩"咗一聲. 所以今日決定早D放工 (好耐冇試過早過7點放工), 跟住就快快手咁同老婆落屋企樓下既碼頭, 睇日落同影下相浪漫下, 我地見到咁靚既景色都好開心 雖然影咗五分鍾就落雨…..睇真D原來西環都幾靚幾有味道!

 

時下的年青人

最近新聞成日話依家D後生仔又吸毒又唔讀書, 講真我聽到一D都唔覺得出奇. 因為根本咁多年來一直都有呢D後生仔存在, 只係大家冇留意佢地, 又或者冇見過一D以前所謂BAND 5既學校學生既惡行. 同埋, 就算係BAND 1名校, 都唔係個個咁乖, 都有壞人.

最記得當年我中五會考考得超低分, 低分到讀唔到中六, 但係又唔想重讀 (因為知道再考都係唔OK), 唯有去搵一D超"垃圾"既學校讀中六, 好彩多得我大哥幫手, 最後都有書讀.

呢間係一間工業中文中學, 仲要係男校, 我都預咗D學生比較差, 但係我返咗一兩個月後, 真係O晒咀. 有一次, 我返學悶悶地望出窗, 見到有十幾個初中生係操場向住大閘口狂跑, 跟住就好熟練咁爬牆途學, 日日如是. 跟住有一日我同佢地打籃球(打波可以打破隔膜), 我就八掛問佢地去邊, 原來佢地去葵X度返工賣老番VCD, 非常普遍.

再激既係, 有一次我行經過課室, 佢地係裡面拆樓, 粉刷大戰, 爬上去天花板D風扇度, 最後玩到D電線鬆晒, 成個天花板既風扇同燈全部下榻, 睇到我呆咗! 仲未夠, 又有一次, 唔知係咪有個阿SIR得罪咗一個黑道中人, 我係操場好似打緊波, 睇住有一張"燈"係一樓拋落樓, 直插阿SIR既車頂, "砰"一聲, 今次我唔知係用MUG咀去形容, 成車"LIP"晒.

仲有非禮嚴重, 因為中六有女生, 有一次有個衰仔係女廁某一格"LAY"埋, 跟住有女仔係隔離廁格既時候就係上面偷窺, 搞到個女仔大叫報警. 當然仲有好多冇數咁多既打交, 用籃球"DUMP"老師等等, 目不下吸! 佢地有冇吸毒?! 我就真係唔知. 剩係知警車係門口成日STANDBY, 999都慳返!

最近我同我D表弟妹中學生出街玩食飯吹水, 當然佢地全部都好乖, 不過我覺得時下既年青人太小同人溝通, 可能個個都FACEBOOK同MSN, 都唔使點發聲, 我覺得唔係太好, 大個做野會好汁輸, 讀書唔叻唔緊要, 只係期望佢地多D表達自己, 唔好剩係講潮語同睇o靚模啦!

值得懷念既貼紙相…最緊要係有中學生應有既天真笑容:)

Wii Sports Resort

最近愛上玩Wii Sports Resort, 個remote加咗個叫做"PLUS"既野後, 真係detect得勁到你唔信, 以前打Golf game, 你是但一"fing”就可以打到, 但係今次你會發覺如果你係唔識打GOLF, 你會係真係打唔到個波, 因為佢真係DETECT到你差唔多成個動作. 雖然我Physics畢業, 都係我都諗唔太明佢點做到咁犀利! 大家有興趣既就去我度玩下啦!